Shillong, Naiwieng 26 : Ka jingïalehkai U-19 Cooch Behar Trophy hapdeng ka Meghalaya bad ka Karnataka ka la sdang hynne ka sngi Saitjaiñ ha madan ïalehkai jong ka MeghalayaCricket Association (MCA) ha Polo. Kane kadei ruh ka sien kaba nyngkong eh ba ïa ka U-19 Cooch Behar Trophy la pynlong ha madan jong ka MCA.
Ha kane ka sngi, u Sachin Kumar u la lah ban ïalehkai bha ha ka liang ka tied bol na bynta ka Meghalaya ha ka sngi sdang jong katei ka lympung pyrshah ïa ka Karnataka da kaba kamai 60 ron ha ki 104 bol hadien ba ka Karnataka kaba la jop ïa ka jingkynting pisa ka la kawang bol nyngkong.
Ha katei ka inning u Sachin Kumar u la khyrwit 11 ron, hynrei kiwei pat ki paralok kim shym la lah ban kamai ron ha kaba ka Meghalaya ka la shah pynhap lut baroh ki wicket da kaba kamai tang 157 ron. Ha ka pali tied, ka Karnataka ka kamai 130 ron duh noh tang 1 wicket, bad dang shah lamkhmat da 27 ron.
Ka Meghalaya Cricket Association ka la pynkup burom ïa ki umpire bad ïa kiwei pat ki official kiba la shim bynta ban pynïaid ïa kane ka jingïalehkai. Hashwa ban sdang ka jingïalehkai la pynlong ka jingsngap jar ba shi minit kum ka dak ka jingkynmaw burom ïa ki san ngut ki Khasi kiba la shah siat ïap ha ki Pulit Assam jong ka shnong Mukroh ba la ïashim bynta lang da baroh.
Ka long ka sngi kaba khraw tam na bynta ki nongïalehkai ka jylla Meghalaya kiba la ïoh ka jingai jingkyrshan lang da kiba haïing hasem bad ki paralok, ha ryngkat ki player senior nalor kiwei kiwei kiba la wan ban ai jingkyrshan.
Pynban, ka Meghalaya kam lah ban ïalehkai bha ha kane ka sngi sdang, ha kaba u Dhanush Gowda R jong ka Karnataka u la lah ban kawang bol bha ban pynhap ïa ki wicket jong ka Meghalaya.
U Sachin bad u Mrinal Das haba wan ban tied ki la kamai lang da 45 ron shwa ba u Mrinal Das un shah pynhap wicket noh. Ki lai ngut kiwei pat ki rangtied bol ka Meghalaya ki la shah pynhap wicket shwa ka jingbam ja sngi bad u Sachin u la hap wicket noh tang ha kaba sdang jong ka kylla kaba ar ha ki kti u Aashish Mahesh u rangp wicket ka Karnataka.
Ïa ka wicket jong u Sachin la ïoh da u Mohsin Khan, ha kaba utei u rangkawang bol spin u la pyndep da kaba khur 7 wicket ai kamai 51 ron. La i ruh ba un khur lut baroh ki wicket jong ka Meghalaya tang hapoh ki minit hadien ba u la ïoh ban pynhap ka wicket u Sachin, hynrei u Bharat Gurung u la lah ban pynneh ïa la ka jong ka wicket da kaba kamai 28 ron (not out).
Ki katto katne pat ki rangtied ka Meghalaya kim shym la neh slem ha kaba hynrei u Mohsin u la ïoh ban khur wicket bad ka Meghalaya ka la hap lut baroh ki wicket da kaba kamai tang 157 ron.
Ka Karnataka ka la ïoh ban tied ha ki shi kynta shwa ban dih sha sngi bad ka la lah ban kamai ron khlem da duh wicket. U Vishal Onat, hadien ba u la kamai 63 ron, u la hap wicket noh ha ka kylla ïalehkai kaba lai bad kaba khatduh, ba la ïoh kem da u Bharali lyngba ka bol ba la kawang da u Gurung (1/21). Ka Karnataka ha ka sngi U Blei kan tied biang bad mynta ka kamai 130/1.
