Sdang ka jingïalap ïada na ka jingpang Diarrhoea, kaba jia bha ha ki khyllung khynnah

Shillong, Naitung 19: Ka District Medical & Health Officer office, East Khasi Hills ka la sdang ïa ka jingïalap ban pynkutnoh ïa ka jingpang Diarrhoea ha ka District Level ha kaba ïa kane la pynlong ha Laitlyngkot PHC ha ka sngi Thohdieng da ka jingthmu ban pynduna ka jingkhlad noh ki khynnah kiba hapoh ki san snem bad kumjuh ruh ban pynïoh ki lad sumar na ka bynta ka koit ka khiah jong ki khynnah.
U Bah Gavin M Mylliem, MLA, Sohra Constituency u la long u kongsan ha kane ka prokram ïalap bad haba kren ha kane ka jingïalang u MLA u la kdew ba kumba 8% na ka mang tyngka ka jylla Meghalaya la dep ban bhah sha ka tnat ka Koit ka Khiah naba ka dei kawei na ki kam ba hakhmat jong ka sorkar. U la pynkynmaw ba ka tnat ka Koit ka Khiah ka la pynlong ïa kiba bun ki jingpynsngewthuh paidbah halor ka Koit ka Khiah na ka por sha ka por.
U la kyntu ïa baroh kiba donlang ha ka programme ban pynphriang ïa ka khubor kaba ki la ïohpdiang sha ki longïing, ki paralok bad kiwei ban pynlong ïa kane ka prokram kaba jop bad ban pynbha ïa ka Koit ka Khiah jong ki nongshong shnong kane ka thaiñ.
U la kyrpad ruh ïa ki nongïalam shnong ban khot ïa baroh ba kin pynïasoh ïa ki Aadhaar card bad ka MHIS khnang ba kin ïoh ki jingmyntoi na ka MHIS ha ka por ba ki shah sumar ha ki Hospital. U la ïathuh ruh ba ka Laitlynkot PHC ka la ïohpdiang ïa ka Ambulance ban pynbha ka rukom treikam haba ïadei bad ka jingsumar kaba kyrkieh (emergency medical care).
U la ai ruh ka jingïaroh ïa baroh ki doctor, ki nurse, aganwadi, ANM bad baroh kiba trei ha ka Koit ka Khiah wat hapdeng kiba bun ki jingeh bad ki jingïaleh ki la trei khlem shong thait ban kyntiew ïa ka koit ka khiah ki nongshong shnong ka jylla Meghalaya.
Haba kren shaphang kane kam ïalap, ka Dr. J. Nongrum, Paeditrician, Sohra CHC ka la wanrah ïa ka jingpynsngewthuh paidbah shaphang ki daw, ki dak ki shin bad ka jingsumar ïa ka jingpang pynhiar kpoh (Diarrhea). Ka la banjur halor ka jingdonkam ban shim ki sienjam ban ïada, ba kynthup ïa ka jingsait bha ïa ki kti, ka jingkhuid kaba shimet, bad ka jingpyndonkam ïa ki ORS bad Zinc ban ïakhun ïa ka jingpang diarrhoea. Ka la banjur ïa ka jingdonkam ban ai buiñ bad ka bam kaba koit ba khiah, ka ban ïaid lang ha ka lynti ban ïada ïa ki khun na ka jingpang diarrhoea bad kiwei pat ki jingpang.
Katba ka District Medical & Health Officer ka Dr. A Kharduit ka la banjur halor ka jingdonkam ban ai injek manla ka por, kaba long kaba donkam na ka bynta ki khynnah bad ka koit ka khiah ki paidbah naba ki ïada ïa ki jingpang, ki jingduna ki dkhot met, bad ki jingïap na ki daw ki jingpang. Ka la banjur halor ka jingdonkam ban leh bun ki test bad jingkhmih bniah, ban lap ïa ki jingpang kum ka high blood pressure, high cholesterol, bad katto katne ki jingpang bampong ha shwa ba kin long kiba ma.
Ïa ka prokram la pynkut da kaba aiti ïa ka Ambulance da u MLA sha ka Laitlyngkot PHC, kaba la pynbud pat da ka Blood Donation Camp.