Sdang ka jingaiti bad shimti ïa ki langkñia ha ka Raid Mawlieh ban pyndep ïa ka lehniam Hima Khyrim

Shillong, Naiwieng 09 : Kane ka dei ka snem kaba saw, naduh ba la sdang ka jingaiti bad jingshimti ïa ki langkñia ha ka Raid Mawlieh ban pyndep ïa ka lehniam leh rukom jong ka Hima Khyrim, ka ban long haka 11 bad 12 tarik mynta u Naiweng 2024.
Saw snem mynshuwa ynda la poi ka taïew ba pynkhreh ïa ka jingleh niam Pom Blang ne kaba ju tip ruh kum ka Shad Nongkrem kaba ju pynlong ha phyllaw jong ka ïingsad ka Hima Khyrim ha Smit, ki Myntri jong ki shnad Raid jong ka Raid Mawlieh, ki ju leit aiti ïa ki Langkñia da lade sha ïingsad ryngkat ki Bhet ne ki jingai sngewbha.
Hynrei la saw snem mynta, kine ki myntri kim donkam shuh ban leit da ka met shaduh ïingsad ban leit aiti ïa kine ki Langkñia, hadien ba u Lyngdoh jong ka Raid Kmie Mawlieh u la shimti noh ha lade ïa kine ki Blang bad shim ka jingkit khlieh ban pynpoi pat sha ïingsad.
Katkum ka jingïathuh da u Bah Firmly Lyngdoh, Lyngdoh Raid Mawlieh jong ka Hima Khyrim la ong ba ki Blang kiba la wanrah na ka bynta ka jingleh niam na baroh ki Raid kiba hap hapoh ka Hima Khyrim, ki dei ban dei ki blang kiba khlem don kano kano ka jingthoh dak ha ka rong jongki bad ki dei tang ki blang kiba lieh, kiba lah ban kñia bad ki dei ruh ban dei ki blang ki bym wad kmie shuh.
Shuh shuh u la ïathuh ruh ba ha kane ka jingïalang aiti bad shimti ïa kine ki langkñia bad ki Bhet kaba long ha ka 09tarik Naiwieng ha ka shnong Mawlieh, la ïadon ryngkat ruh ki Myntri jong ki shnad Raid bapher bapher kiba hap hapoh ka Raid Mawlieh, kumjuh ki nongmih khmat na ka Khasi Hills Autonomous District Council bad ki paidbah jong kane ka Raid. Ki shnat Raid kiba hap hapoh ka Raid Mawlieh kaba long kum ka Raid kmie,ki long ka shnat Raid Wahkhen, Nongkhlieng, Nongblai, Mawja, Mawlam, Nongshken, Lyting Nongsohphan, Nashain, Pyrjat, Sha-twiat bad Ri 6 Kur.