Sdang ka IXth Inter School Knock-Out Football Tournament jong ka FKJGP

Shillong, Nailar 23: Ka FKJGP jong ka Mawlai Circle hynne ka sngi Balang ka la ïoh ban plie pyrda ïa ka lympung lehkai phutbol kaba la tip da ka IXth Inter School Knock-Out Football Tournament ha ryngkat ka phuh ka phieng kaba la pynlong ha Madan Heh Mini Stadium, Mawlai Phudmuri ha ka por 3 baje janmiet. Ha kane ka sngi plie pyrda la wan sakhilang lem bad ki khynnah jong ki skul kiba ïashimbynta ha kane ka lympung ryngkat bad ki dkhot na kiwei ki seng, kiba kynthup ïa ka KSU bad ka HNYF.
Ha kane ka sngi u Bah Dundee Cliff Khongsit, President FKJGP Sengkmie u la long kum u kongsan katba u Bah Arkinfield Khonglam Sports Secretary FKJGP Sengkmie kum u symbud kongsan.
Haba phai pat sha ka jingïalehkai, ka O.M Roy Memorial School ka la ïoh ban bteng ïa ka lynti ïaid jong ka da kaba pynkhyllem noh ïa ka Jaiaw Presbyterian School da 6-1 kol.
Ka namtam ha kane ka jingïalehkai ka la leit sha u Banteilang Syngai u ba la khyrwit haduh 3 kol na ka bynta ka kynhun kiba la thep ha ka 22, 25 bad 35 minit. U Risjoy Syiemlieh u la ïoh ban thep 2 kol haka minit ba 18 bad 20 katba u Samborlang u la thep ïa ka shi kol ha ka 58 minit. Na ka liang jong ka Jaiaw Presbyterian ka shi kol la thep lyngba ka penalty ha ka minit ba 57 na u Wankam Disiar.
Kumban shu pynkynmaw ki skul kiba ïashimbynta ha kane ka lympung ki don haduh 15 tylli, ka O.M Roy Memorial School, Jaiaw Presbyterian School, Nongkwar Pres. School, MLP School, ka Garce Care Academy, Christ Church Day, Mawlai Pres. Sec. School, Christian Academy School, Mayqueen School, ST. Denis School, ka Stephan Memorial School, Umrynjah School bad khadduh ka Nongkwar Sec School kaba la ïoh ban kyntiew lypa sha ka quarter final.