Shillong, Nailur 30 : Ka lympung ïalehkai phutbol Inter Village Football Tournament ba la pynïaid da ka Youth Congress Mendipathar ka la sdang hynne ka sngi Thohdieng ha Thapa Agitchak ha kaba u Timjim K Momin uba dei u President ka Youth Congress bad u kyrtong jong ka party u la plie pyrda uba la bei tyngka ruh ïa katei ka lympung ïalehkai phutbol.
Ha kane ka sngi la donlang ruh ki nongkitkam jong ka Block Congress Committee jong ka Mendipathar Constituency, ki nongkitkam ka Meghalaya Pradesh Youth Congress ba kyntup u genral secretary ka ba dei peit ïa ka East bad North Garo Hills u Dr. Tuel Marak.
U Timjim Momin haba ai jingkren u la ai mynsiem ïa ki samla ba kin wan shakhmat ban ïashim bynta ban pynpaw ïa ki sap ïalehkai.
U la banjur ruh na bynta ki samla ha ka politik bad ruh ka jingbym ïoh kam ïoh jam kadei namar ba bunsien ki paidbah kim jied ïa ki nongmihkhmat kiba don shisha ka mynsiem bad ka thong ban kyntiew ïa ka constituency bad kumjuh ruh ïa ka jylla baroh kawei. U la ong ruh ba ka donkam ban pynkylla ïa ki nongïalam da kaba peit ïa kiba la nang la stad bad kiba don ka lawei na bynta ka pateng ban wan.
Ha kane ka sngi plie pyrda la wan ban sakhi da ki hajar ngut ki paidbah kiba la wan na kylleng ki bynta jong katei ka thaiñ.
