Shillong, Jylliew 21 : Ka lympung ïalehkai District Inter School Subroto Cup u DSO ka East Jaiñtia Hills District ka la sdang ha ka sngi bar (21-06-2022) ha kylleng ki madan ïalehkai kiba hap ha katei ka District.
Ha kane ka lympung ki don 27 tylli ki skul kiba la wan ban ïashim bynta.
Ha ka sngi sdang jong ka Under 17 (boys) kaba la pynlong ha madan ïalehkai ha Wapung, ka Byndihati SS ka la jop da kaba pynliem da 1-0 pyrshah ïa ka Divine Word SS, ka Little Flower SS ka la rem da 0-1 ha ka Latyrke SS.
Ka Chiehruphi SS ka la khur jingjop da kaba pynliem da 4-1 pyrshah ïa ka Rymbai Presbyterian HSS katba ka Wapung SS ka pynliem da 4-0 ïa ka Sutnga Pressbyterian SS.
Ha ka Under-14 kaba la pynlong ha Dkhiah West, ka Chieruphi SS ka la pynliem kput da 7-0 pyrshah ïa ka Rymbai Govt SS, ka Musniang SS ka la jop da 5-0 ïa ka Little Star SS. Ka Khliehriat HSS ka la jop lyngba ka tie breaker da 3-2 ïa ka Khliehriat Presbyterian HSS.
Haba phai sha ka Under 17 (Girls) ka Dkhiah East ka la pynliem da 3-2 pyrshah ïa ka Wapung SS, ka Khula M alang ka jop da 2-1 ïa ka Byndihati SS bad ka Lotus SS ka pynliem da 1-0 pyrshah ïa ka Morning Glory.
