SOHRA, Lber 10: Ka East Khasi Hills Cricket Association [EKHCA], ha ka 10 tarik Lber, 2025 (sngi Nyngkong), ka la ïoh ban sdang ïa ka lympung ïalehkai kriket, ïa kaba la tip da ka ‘Inter Office Cum Corporate League T20 Cricket League 2025, ha madan Pynshadkhurai, ha Saitsohpen, Sohra. La plie pyrda ïa ka jingïalehkai ba nyngkong hapdeng ka NIT Meghalaya pyrshah ïa ka Telecom Combine, ha kaba ka Telecom Combine ka la jop salit da 9 ron.
Hadien ba jop ïa ka jingkynting pisa (toss) ka Telecom Combine ka la rai ban tied nyngkong ha kaba ka la lah ban kamai 136/7 haduh kaba kut jong ka 20 ober. U Bah Teibansuk Sohkhlet u la lamkhmat ha ka tied da kaba kamai 29 ron naki 38 bol. U Jefferson Thabah u la khur 3/33 naki 4 ober.
Ka jingïakhun ka long kaba itynnat namar ba ka NIT Meghalaya ka la ïakhun shitom hynrei sahdien noh da tang 9 ron ban kynjoh ïa ka thong, namar ba ka la shah khanglad noh da tang 127 ron ba khyllem lut baroh 10 wiket haki 19.5 ober, na ka liang jong u Holding Mewell Surong u la lah ban kamai 18 ron naki 22 bol. U Wanpyndapbor Diengdoh u la khur 2/9 naki 3 ober, hynrei ïa ka nam ‘Player to The Match la khur da u Bah Teibansuk Sohkhlet.
Kumban shu kdew hangne, ka EKHCA ka la pynlong khnang ïa kane ka Inter Office Cricket League kum shi bynta ban ailad ïa ki nongtrei jong ki Ophis treikam bapher bapher ba kin ïoh ban pynkhih bad kilanmet ïalade da kaba shim bynta ha ki jingïalehkai.
Ki don baroh shiphew (10) tylli ki kynhun kiba ïashimbynta ha kaba la phiah ïa ki ha ki ar tylli ki Group kaba mar 5 tylli ki kynhun. Ka Group A ka kynthup ïa ka NIT Meghalaya, Telecom Combine, MLP Sohra, PHE Sohra Division bad ka Exporter XI, katba ha ka Group-B ki kynhun ki long ka Ri-Bhoi Office Combine, Sohra Post Office, Combine SHG, SSA Shela Bholaganj bad ka Sohra Labour Union.
Katkum ka prokram ba la pyllait, ki jingïalehkai League stage ka la sdang naduh ka 10 tarik Lber ban bteng haduh 26 tarik Lber, 2025, nangta kan bud sa ka Semi final ba la buh ha ka 28 tarik Lber, 2025, ha kaba tang ki nongjop jong baroh ar tylli ki Group (A bad B) ryngkat bad kiba wan ba ar kin ïohrung sha kane ka wat ïakhun. ïa ka final la buh ban long ha ka 31 tarik Lber, 2025.
