Sdang ka India ïa ka SAFF U-17 Women’s C’ship 2025 da ka jingjop kaba khraw

Thimpu (Bhutan), Nailar 20: Ka kynhun ki thei-ïalehkai phutbol U17 jong ka India ka la wanrah ïa ka khubor kaba sngewtynnad ha ka jingïalehkai ba nyngkong jong ka SAFF Under-17 Women’s Championship 2025, ha kaba ka la pynliem suk ïa ka Nepal da 7-0 kol ha Changlimithang Stadium ha Thimphu hynne ka sngi Balang.
Ki ar kol na ka Nira Chanu Longjam (25’, 56’), ka Abhista Basnett (16’ 41’), bad ka Anushka Kumari (37’, 62’) ryngkat bad kawei ka kol na ka kapten ka Julan Nongmaithem (45+1’) ka la pynthikna ïa ka jingsdang kaba khlem jingduna ha ka rukom ïalehkai jong ka India.
Ki arngut ki thei ïalehkai ka jylla Meghalaya ki la ïoh ban mih madan ha kane ka jingïalehkai, ha kaba ka Alisha Lyngdoh ka la ïalehkai baroh kawei ka jingïakhun hadien ba ka la shah jied ha ka thup kynhun jong ki 11 ngut kiba sdang, katba ka Bonifilia Shullai ka la mih kum ka nong bujli ha ka minit kaba 63 ha ka jaka jong ka Nongmaithem.
Ka kynhun ki thei ïalehkai U-17 jong ka ri ki la pynskhem ïa ka jingjop naduh ka kylla step da kaba lamkhmat 5-0 ïa ka jingïalehkai, kaba la pynduh syndon ïa ka jingkyrmen na ka bynta ka Nepal ban pyrshang pynkhie im biang ïa ka jingïakhun.
Ki set-piece (corner & free kick) ki la paw ba ki long ki atiar kiba kongsan na ka bynta ka India ha kane ka jingïalehkai. Ka kol kaba nyngkong ka la wan ha ka minit kaba 16 hadien ba jingthmu pashat bol shadien na ka liang pyrshah ka la pynlong ïa ka India ban ïoh corner. Ka Shveta Rani ka la pashat ïa ka bol kaba thikna na ka liang kadiang ka la pynlong ïa ka nongap kol ka Nepal ka Jharna Dumrakoti ban nym lah tehlakam ïa ka bol. Ka Basnett ka la long kaba kloi tam ban leh eiei, da kaba thep suk ïa ka bol sha kol.
Ka India ka la pynjlan ar shah ïa ka kol ha ka minit kaba 25. Ka Kumari ka la pashat ïa ka bol kaba itynnad bha ha lyndet jong ki nongïalehkai ba shadien na ka bynta ka Nira Chanu, kaba la shimti ïa ka bol bad pynrung lyngba ka Dumrakoti shapoh kol.
Nangta ka Kumari ka la ïoh ban kyntiew ïa ka kyrteng jong ka ha ka thup thep kol ha ka minit kaba 37, da kaba mareh pynstet sha ka bol kaba la pynrung shakhmat shuwa ban thep bad pynlong ïa ka India ban lamkhmat da 3-0.
Tang saw minit hadien, ka Basnett ka la ïoh ban pynkhih ïa ka kol kaba ar. Ka bol pashat na ka Kumari kaba la thmu ban ai ïa ka Chanu ka la shah khanglad da ka Anshu BK, hynrei ka Basnett ka la bat ïa ka bol kaba lait ban pynkhihjar ban pynjlan ïa ka kol sha ka 4-0.
Ha ka khyllipmat shuwa ban kut ka kylla step, ka India ka la pynkhih ïa ka kol kaba san. Ka jingïaknieh kaba jur hadien kawei pat ka corner la ïohi ïa ka Nongmaithem kaba la pynstet bad thep ïa ka bol sha kol.
Watla ka la ïoh ïa ka resol ka la jan long kaba thikna, hynrei ka India kam shym la pyni dak ei ei ban lehkai jai jai ha ka kylla miet. Ha ka minit kaba 56, ka Nira Chanu ka la shem ïalade ba ym shym la don ba pahara bad ka la shut da kaba tyngeh ïa ka bol ban pyndep ïa ka kol kaba ar jong ka bad ban pynjlan ïa ka kol lamkhmat na ka bynta ka kynhun sha ka 6-0.
Ka kol kaba hynñiew ka la wan ha ka minit kaba 62, da ka jingïatreilang bad ka jingïasngewthuh jingmut jong ka Basnett bad ka Chanu. Katba ka nongap kol jong ka liang pyrshah ka la wan ban tur shakhmat, ka Chanu ka la pashat ïa ka bol sha ka Kumari, kaba la pyndep ïa ka kamram ban pynthikna ïa ka jingjop kaba shongkun da 7-0 kol.
Da kaba shim ïa ka rukom ïalehkai kaba la tip da ka double round-robin format mynta u snem ka la long kaba donkam bha ïa ka India ban sdang ïa ka jingïalehkai da ka jingjop bad ki la leh ïa kane ha ka rukom ha kaba shongkun.
Ka India kan ïalehkai pyrshah ïa ka Bangladesh ha ka sngi Thohdieng ha ka por 2:30 baje noh phai sngi.