Sdang ka ICAR KVK ïaka VKSA, buh thong ban kynduh kumba 15 hajar ngut ki nongrep ha Ri-Bhoi

0

Nongpoh, Jymmang 29: Ka ICAR-Krishi Vigyan Kendra, Ri-Bhoi haka jingïatreilang bad ka ICAR Research Complex for NEH Region, Umiam, Central Agricultural University (I) campus CPGSAS, Umiam, ICAR-NBPGR, Regional station, Umiam, Ri Bhoi District Agriculture and Horticulture, ATMA, FPOs, NGOs, ki nongsengkam lajong lem bad ki nongrep kiba la kiew shaphrang mynta ka sngi kila sdang ïa kawei ka prokram bala tip kum ka Vikshit Krishi Sankalp Abhiyan- Bharat Krishi Jagran Yatra: Anusandhan Kisan Ke Dwar bad kan kut haduh ka 12 tarik Jylliew 2025.
Ka thong jong katei ka prokram ka long ban ban kyntiew ïaka rep ka riang, khamtam ban pynjan sha ki nongrep ïaka jingstad bad ka jingwad bñiah kiba thymmai katkum ka juk ba mynta ha kaba ki riew stad jong ka ICAR kina sa leit ban ïakynduh beit bad ki nongrep sha ki jaka rep jaka riang ha kaba kitei ki kynhun jong ki riewstad kin sa leit da ki kali bala tip kum ka Kharid Sampark Rath bad kin don kumba 3 kynhun ki ban leit sha ki shnong bapher bapher bad buh thong ruh ban ïakynduh kumba 450 ngut ki nongrep haka shisngi bad kumba 15 hajar ngut eiei ha kitei ki 2 taiew lynter haki shnong bapher bapher ka Ri-Bhoi District.
Ha kane ka jingleit rung shnong jong ka KVK Ri-Bhoi ryngkat ki riewstad kin sa leit ruh ban ai jinghikai halor ki phang bapher bapher ha kaba ïadei bad ka rukom rep thymmai ban kyntiew shuh shuh ka jingpynmih ïaki mar rep mar riang, naduh ka jingkoit jingkhiah jong ka khyndew, ki rukom bet symbai, ka jinglong jingman jong ka suiñ bneng, ka jingpynneh pynsah ïaka um, ka rukom thung kaba khlem da pyndonkam than ki dawai bad kiwei kiwei, bad ïakitei ki rukom ai jinghikai yn sa leh beit haki lyngkha rep jong ki nongrep.
Naka liang ki ophisar ka ICAR-KVK, Ri-Bhoi haba kren ha katei ka sngi kila ong ba kane ka jingthmu ka long ban pynjanai ïaka rep ka riang khamtam ban wanrah da ka rukom rep kaba thymmai katkum ka juk stad kaba mynta ban kyntiew ïaka rep ka riang bad ban pynmih khambun ki mar rep bad kum ka ICAR-KVK Ri-Bhoi ryngkat ka jingïatreilang bad kiwei kiwei ki tnad kila sdang naduh mynta ka sngi ban rung sha ki shnong bapher bapher ka Ri-Bhoi ban pynlong ïaki jingwad bñiah bad ban ai jinghikai sha ki nongrep.

Leave A Reply

Your email address will not be published.