Shillong, Jymmang 27: Ka Federation of Khasi Jaiñtia and Garo People (FKJGP) Mawlai Circle ha ka sngi Thohdieng ka la sdang ïa ka lympung ïalehkai football kaba la tip kum ka 8th Inter-School Knockout Football Tournament 2022 ha Madan Heh Mawlai Phudmuri.
Ïa kane ka Inter school Knockout Football la wan ban plie pyrda da u Bah Dundee Cliff Kongsit uba dei u Working President ka FKJGP seng kmie kum u kongsan ha ka jingdonlang u Bah Kitboklang Nongphlang uba dei u organising secretary kum u Symbud Kongsan. La donlang ruh ha kane ka sngi ki nongkitkam ka FKJGP Mawlai Circle ba kynthup u Bah Khrawkupar Nongsiej uba dei ruh u President, Bah VP Lyngdoh general secretary, ki nonghikai, ki khynnah skul bad ki paidbah.
Ha kane ka lympung ba mynta u snem la wan ban ïashim bynta da 14 tylli ki skul kiba don ha Mawlai bad shabar jong ka ruh kumjuh, ba kynthup ïa ka Perley Dew, St. Anne, OM Roy, Christ Church Seceondary School, St. Francis, Sacred Heart Boys, Mawkhar Christian HSS, ka Christ Church Morning, May Queen, Sunrays, St. Alloysius, Mawlai Presbyterian, ka Jaïaw Presbyterian bad ka MLP kiiba la rung lypa sha ka quarter-final.
Haba kren kum u kongsan u Bah Dundee Cliff Kongsit u la ai khublei ïa ka FKJGP Mawlai Circle kaba la pynlong ïa kane ka lympung ba ki khynnah skul kin ïoh ban pynpaw ïa la ki jong ki sap ïalehkai bad kyntu ruh ïa ki khynnah skul ba kin trei shitom ha baroh ki liang ban kiew shaphrang ha ka jingim la ka long ha ki jingpule bad ruh ha ki sap ïalehkai ba ki don.
U samla Khrawkupar Nongsiej haba ai jingkren u la ong ba ka seng ka la pynlong ïa ka Winter Shiled ha u snem 2008 na bynta kiba la rangbah hynrei da kawei ka jingmut ki la rai ban pynlong noh ïa ka Inter-School Knockout Football Tournament kaba la sdang ha u snem 2012 da ka thong ban kyntiew ïa ki khynnah skul ha ka kam ïalehkai football.
Ha kane ka sngi plie pyrda ki ar tylli ki skul kiba la mih madan ki long hapdeng ka Pearly Dew pyrshah ïa ka St. Anne ha kaba ka Pearly Dew kala jop da 5-1. Ha kane ka sngi ïa ka jingïalang la pynïaid da u samla Constantine Paul Kharmawlong, la kren pdiang da u samla Varzellino P Lyngdoh, jingkren ai khublei na u samla Daniel Ramsiej. Ha kane ka sngi la pynshongshit ruh da ka jingrwai na ka samla Gabriella Thangkhiew.
