Jowai, Jylliew 02: Ka ophis jong u District Sports Officer West Jaiñtia Hills District, Jowai mynta la sngi 2 tarik u Jylliew kala sdang noh ïaka jingïalehkai phutbol ki khynnah skul kaba la tip kum ka ‘District Level Inter School Subroto Mukherjee Cup Football Tournament 2025’.
Ïa kane ka jingïalehkai la pynïalehkai haki ar tylli ki madan kata ha Kiang Nangbah Stadium, Dongmihsngi, Jowai bad ha Wahiajer Multi Sports Complex naduh ka por 9 baje mynstep bad la don haduh 10 tylli ki jingïakhun mynta ka sngi haka kyrdan Under-17 (boys).
Haba phai sha ki jingïakhuh Under-17 (boys) ha Kiang Nangbah Stadium ka Sawlyngdoh H/S School Mookaiaw kala jop da 2-1 kol ïa ka Jaiñtia H/S School, Jowai. Ka Little Flower H/S School Ummulong kala jop da 5-1 kol ïa ka Lumpyrtuh Secondary School Mihmyntdu. Ka Amwi H/S School Thangbuli kala jop da 4-0 kol ïa ka Tome Memorial H/S School Jowai. Ka H.K Singh Memorial Secondary School Jowai kala jop da 3-0 kol ïa ka Khimusniang Presbyterian Secondary School, Jowai. Katba ka Marian Hills H/S School Jowa kala jop da 2-1 kol ïa ka Mihmyntdu Secondary School Mihmyntdu.
Ki jingïakhun ha Wahiajer Multi Sports Complex ka Albin Lamare Memorial Secondary School Nangbah kala jop da ka jingïashut Tie Breaker da 4-3 kol ïa ka KJP Synod Mihngi H/S School Jowai. Ka Laishnong H/S School Nongbareh kala jop da 3-2 kol ïa ka Adventist H/S School Khliehtyrshi. Ka Govt. Boys H/S School Jowai kala jop da 3-1 kol ïa ka Ummulong Presbyterian H/S School Jowai. Ka Kiang Nangbah H/S School Jowai kala jop haduh 7-0 kol ïa ka On and On Secondary School Ummulong. Katba ka Khasi Pnar Secondary School, Bakur kala jop da ka Tie Breaker da 5-4 kol ïa ka Rising Hills Secondary School Mootyrshiah.
Lashai ka sngi 3 tarik u Jylliew kan bteng biang ka jingïakhuh haka kyrdan Under-17 (boys) bad ka Under-15 (boys).
