Sdang ka Conference ba man u snem jong ka Indian Information Service Officers ha Vigyan Bhavan

Shillong, Naitung 16 : U Myntri Sorkar Pdeng ba dei khmih ïa ka tnat Information and Broadcasting, u Anurag Singh Thakur u la plie ïa ka bynta kaba lai jong ka conference ba man u snem jong ki Indian Information Service Officer ha Vigyan Bhavan. U Secretary, Information and Broadcasting, u Apurva Chandra bad Principal Director General, u Jaideep Bhatnagar, u Satyendra Prakash, u Venudhar Reddy bad u Mayank Kumar Aggarwal ki la ïadon lang ha kane ka prokram. Ki ophisar ba heh kyrdan jong ka Indian Information Service na kylleng ka ri kin ïashim bynta ha kane ka jingïalang kaba ar sngi.
Ha ka jingai jingkren jong u, u Myntri Sorkar Pdeng ba dei khmih ïa ka tnat Information and Broadcasting, u Anurag Singh Thakur u la kren shaphang ki 5 tylli ki kam ba kongsan kiba donkam bha ha ka jingïakren shaphang ki kam Sorkar. Kine ki kynthup – Citizen-Centric bad Compassionate, Co-creating bad ki Target Audience, Collaboration, Contemplation, bad Continuous Capacity Enhancement. U la batai kham bniah da kaba ong ba baroh ki jingïakren ki dei ban long kiba ïahap bad kiba suk ban sngewthuh, da kaba buh shuwa ïa ka jingbha jong ki briew ka ri. U la ban jur ruh halor ka jingdonkam ban ïatrei lang bad kito kiba donkti ha kane ka kam kiba kynthup ki dkhot ka Sorkar, ki jaka trei bad ki kam shimet. U la ong ba ka kam ïakren ka dang mad ïa ki jingkylla kiba stet bad ba ki don ruh ki jingeh kum ki khubor thok da kaba bynrap ba namar kane ka kam ïakren ka dei ban long kaba suk ban pynkylla kumba la ïohi ha ka por ba dang shen jong ka khlam COVID.
U Anurag Singh Thakur u la ïaroh ïa ki ophisar IIS kiba la shim ïa ki sienjam ban wanrah ïa ki jingkylla kum ka Fact Check Unit ban ïada na ki khubor thok ha ryngkat ki sienjam ban plie lad ïa kito kiba don jingduna ha ki dkhot met bad kiwei kiwei ki briew. U la ai jingmut ruh shaphang kiwei kiwei ki sienjam ban pynbha shuh shuh ïa ki lad ïakren ha ki kam Sorkar ban ai jingmyntoi ïa baroh. Ha kane, u la ban jur halor ka jingdonkam jong ki media teknoloji ba thymmai, ka jingpynkhlain ïa ki jaka trei bad ka jingïatrei lang bad ki Sorkar Jylla. U la kyntu ïa baroh ki ophisar ba kin sngewthuh ïa ka jingdonkam jong ki kam jong ki kum ki nongai jingtip sha 130 klur ngut ki briew. U Myntri Sorkar Pdeng u la ban jur halor ka jing pynryntih ïa ki jingai jingtip bad ka jingdonkam ïa ka sap ban ïathuh khana khnang ban kham suh thied ha ki kam. U la ong ruh ba ka jingkyntiew ïa ki jaka trei, ka jingïalam lynti bad ka jingai mynsiem jong ki ophisar ka long kaba donkam.
U Secretary, ka that Information and Broadcasting, u Apurva Chandra u la ong ba ka jingai jingtip ha ka por jong ka khlam COVID-19 ka la pyntngen ïa ki briew bad ka la ïarap bha ban weng ïa ka jingsheptieng. Ka la pynthikna ruh ïa ka jingïoh jingtip ki briew shaphang ki sienjam na ka bynta ka jingbha kum ka kam ai dawai tika bad ka Pradhan Mantri Garib Kalyan Anna Yojana. U la ong ba haba ïanujor bad kiwei kiwei ki ri, ka jingartatien ban ai dawai tika ka duna bha ha India, bad namar kane ka ri ka la jan poi sha 200 klur ki dose ha ka jingai ïa ki dawai tika.
U Principal Director General, u Jaideep Bhatnagar u la ong ba ki thong kiba kongsan jong kane ka Indian Information Service ka dei ban pynkupbor bad ban plie lad, ka jingïakren bad ki briew ha kano kano ka por, ka jingïakren ban wanrah ïa ka jingkylla ha ka rukom im, bad ka jingïaleh pyrshah ïa ki khubor thok. U la ong ba ka kam ka la kylla bad ka la kham ïar namar ka jingroi ki kam ai jingtip ha kine ki snem ba la dep kaba la ïalam sha ka jingdonkam ban pyrkhat thymmai bad ban wanrah ïa ki rukom trei bad ki kam kiba thymmai.
Da kaba pdiang ba ki bun ki jingkylla ha ki kam ai jingtip katba dang ïaid ka por, kane ka conference kaba ar sngi kan peit thuh ïa ki jingeh kiba dang mih bad ban thaw lad ban don ki lad ai jingtip kiba biang tam ha ki por ban wan. Ki jingïakren ha kine ki ar sngi kin peit kham bniah ïa ka ‘Communication for India@2047’, ‘Skill & Capacity Building’, ‘Projecting India Abroad with Focus on G20’, ‘Evolving Role of Government Communication’ ha kaba yn ïoh jingkren na ki riewshemphang kum u Abhishek Singh, CEO MyGov; Dr. R. Balasubramaniam bad u Hemang Jani, Capacity Building Commission, u Arindam Bagchi, JS (XP) MEA bad u Amitabh Kant, India’s Sherpa to G-20.
Ïa ka jingkren kyrpang ha ka sngi kaba ar yn ai da u Myntri Sorkar Pdeng ba dei khmih ïa ki tnat Railways, Communications, Electronics & Information Technology u Ashwini Vaishnaw, katba u Myntri Khynnah ka tnat Information and Broadcasting, u Dr. L Murugan un ai ïa ka jingkren pynkut.