Sdang ka Caring Cohorts ïaka tamasa tlang ban ïarap ïa ka Sati Raja Memorial Secondary School

Nongpoh, Nohprah 13: Ka kynhun Caring Cohorts kaba dei kawei naki kynhun ki shi paralok kaba ju trei mon sngewbha naka bynta ka bha ka miat jong ka imlang ka sahlang bad kaba ju kner la ki kti jingïarap ïa kiba donkam ka jingïarap mynta ka sngi kala sdang ïaka tamasa tlang lane ka Winter Festival ba 3 sngi lynter ha madan Umsning.
Ïa katei ka tamasa tlang la wan ban plie pyrda da u Bah Donlang Sohkhlet kum u kongsan, u Bah Bipul Thangkhiew President ka RBYF kum u symbud kongsan, u Raja Brahma BDO ka Umsning Block, Bah Rocky Kylla Chairman ka Umsning Town Dorbar, Bah Rocky Marweiñ Rangbah Shnong ka Umsning Proper B, ka kong Balakyntiew Umbah Head Mistress ka Sati Raja Memorial Secondary School, ki nongïalam ka Caring Cohorts naduh u Bah Silvester Mawthoh President, Charles Kylla General Secretary, Phrangsngi Kylla bad kiwei kiwei.
Naka liang u President ka Caring Cohorts u Samla Silvester Mawthoh u la pynpaw ba kum ka kynhun ki shiparalok da kawei ka mynsiem ban peit ïaka khia ka shon hapoh ka imlang sahlang bad ruh ban kyrshan ïaki katto katne ki shlem ai jinghikai ha kane ka sien ka ba nyngkong ki la jied ïaka Sati Raja Memorial Sec. School Umsning kaba dang don hapdeng shibun ki jing duna naduh ki kamra Klass haduh ka surok bad bun kiwei ki jingduna kaba kum ka skul ka mad jingeh bad donkam, bad dei halor katei ka nongrim kum ka jingpynmih pisa kila rai ban pynlong da ka tamasa lehkmen kaba la tip kum ka Winter Festival kaba 3 sngi lynter bala sdang naduh mynta ka sngi.
Kum ban shu pynpaw ba ïa ka skul Sati Raja Memorial Secondary School la sdang naduh u snem 2004 bala seng da u Bah O.B. Ranee (Bam kwai ha dwar u Blei) u ba dei ruh u nongïalam jong ka RAWA ban pynphriang ïaka jing nang jingstad ïaki khynnah ka thaiñ Umsning kaba haduh mynta kalong ka wei naka shlem ai jinghikai kaba la pynmih shibun ki rang bad ki thei ïalehkai sports bad kumjuh ruh ki khynnah kiba la pass bha na katei ka skul.
Haba kren ha katei ka sngi naka liang u Bah Donlang Sohkhlet kum uwei naki riew rangbah ka thaiñ Ri-Bhoi u la pynpaw ka jingsngewkmen kaba khraw halor ka jingïohi jngai ki khun samla naka thaiñ Umsning, kiba la shim ïaka sienjam ban pynlong kum katei ka tamasa lehkmen naka bynta ka kam ba bha ban shakri ha ka imlang ka sahlang khamtam ban kyntiew ïaka pule puthi lyngba ka jingthmu babha jong ki ban ïarap ïa katei ka skul.
U la ong ruh ba katei ka skul kadei kawei naki skul kaba la paw haka thaiñ Umsning kaba ju pynmih ruh ïaki khynnah kiba stad bad khamtam kiba ju pynmih ruh ïa shibun ki nongïalehkai sports ba paw naka them Ri Bhoi kaba long ka jingsarong kaba khraw, bad kyntu ruh ïa kitei ki nongïalam ba kin dang bteng ban shakri naka bynta ka bha ka miat haka imlang ka sahlang baroh kawei.
Naka liang ki nongïalam katei ka kynhun kila ïathuh ruh ba haka ne ka tamasa kin don shibun ki jing pyn byrngia naduh ka tem ka rwai lyngba ki kynhun tem ba pawnam kum ka Snow White bad ki wei kiwei kan don ruh ka jingpynkhalai nusib, bad naka liang katei ka kynhun kala mih sha khmat bad kila khot la wer ïaki paidbah ka dong Ri-Bhoi bad na ki wei ki jaka ban sakhi ïaka ne ka tamasa lehkmen naka bynta ka kam babha ka ba kum ka kynhun ka don ka jingthmu.