Nongpoh, Nohprah 07: Ka BJP Jirang Mandal ka la sdang ban pynkhlaiñ ïa ka jingtreikam jong ka party sha ka election 2028 da kaba pynlong jingïalang, jingpynshai bad jingïalap sha ki paidbah halor ki kam pynroi kiba ka BJP ka la wanrah ha ka sorkar pdeng. Ka thong jong kane ka jingïalang ka long ban sei madan ïa ki kam jong ka party bad ban wanrah ruh ki nongrim bathymmai ha ki shnong ki thaw hapoh Jirang Constituency.
Ha ka jingïalam u President ka BJP Jirang Mandal, Bah Albertus Lapang, ki nongïalam ka party ki la pynlong jingïalang ha Dorbar Hall ka Shnong Harlibagan, Byrnihat, ban ïa kren halor ka jingpynkhlaiñ ïa ka party sha ka election 2028.
Ha kane ka sngi la ïa don lang u State Vice President, Bah Khrawboklang Basaiamoit, ka Kong Delina Nonglait, kaba dei ka In-charge ka Ri-Bhoi, u Bah Hemanta Timung, State President ka ST Morcha, u Bah Sen Thabah, District President lem bad kiwei ki nongïalam jong ka BJP.
Ha kane ka sngi la ïadon lang ruh da ki nongïalam na ka Congress bad NPP kiba la thmu ban wan pynïasoh sha ka BJP, kiba kynthup ïa u Bah Opos Lapang, Bah Romes Syngkli, Bah Rison Pohshna lem bad kiwei de.
Haba ai jingkren, ki nongïalam naduh u President ka BJP Jirang Mandal bad u Bah Hemanta Timung ki la kren sani halor ki kam pynroi kiba la wan rah da ka BJP ha ka sorkar pdeng. Ki la ong ruh ba lada ki paidbah jong ka Jirang Constituency bad ka jylla Meghalaya ki kwah ban wan ki kam pynroi, ki dei ban ai ka jingshanñiah bad kyrshan ïa ka BJP ha ka election 2028.
Ki la kdew ruh ba lada ka BJP ka ioh ban synshar ha ka jylla bad ha ka sorkar kmie, ki kam pynroi kin dang tuid shaphrang lyngba ki projek bapher bapher.
Ha kane ka jingïalang, ki nongïalam ki la pynpaw ruh ba ka BJP ha Jirang ka la nang kiew shaphrang, bad bun ki nongïalam na Congress bad NPP kin sa wan pynïasoh noh shen sha ka party. Ka thong ba hakhmat ka long ban pynkhlaiñ ia ka BJP ba kan long kaba lah ban jop ha ka Election 2028 na Jirang Constituency.
