Nongpoh, Ïaiong 08: Ka seng Samla jong ka shnong Nongpoh Proper mynta ka sngi haka sien kaba 2 kala sdang ban pynlong biang ïaka Berchem Cup 2022 ka lympung ïalehkai basketball ki samla ha madan ïalehkai basketball ka dong Sajer Nongpoh.
Ïa katei ka lympung ïalehkai basketball la wan ban plie pyrda da u Bah Bipul Thangkhiew President ba rangbah ka RBYF kum u kongsan haka jingdonlang u Bah Bah Sylvester Mynsong, Rangbah Shnong, Bah Michael Kharhunai Secretary, u Samla Anthony Suchiang, President ka Seng Samla, samla Ronald Rani, Organizing Secretary nalor kiwei kiwei ki riew rangbah ka thaiñ Nongpoh.
Haba phai sha ki jingïakhun ha ka sngi plie ïa kane ka lympung la sakhi ïa ka jingïakhun kaba itynnad bad kaba pynshongshit shikatdei ïa ki paidbah kaba la ïa khun da ki kynthei kata hapdeng ka Shillong Labet pyrshah ïa ka SYM, ha kaba ka kynhun jong ka Shillong Labet ki la ïoh ban khur ïa ka namjop da kaba pynliem ïa ka SYM da 43 la 14 basket.
Ha ka jingïakhun kaba ar kaba la ïakhun da ki shynrang, ka jingïakhun kaba itynnad bad kaba ïakhaid bormet bha ka la long hapdeng ka kynhun jong ka Seng Samla Nongpoh pyrshah ïa ka kynhun Monarchs, bad hapdeng ka jingïakhun kaba jur ka Monarchs kala lah ban pynliem noh ïaka seng Samla Nongpoh da 61-50 basket.
Haba kren ha katei ka sngi naka liang u Bah Bipul Thangkhiew kum u kongsan u la ai ka jingïaroh ïaka Seng Samla Nongpoh kaba la shim biang ïaka sienjam ban pynlong ïa kum ka katei ka lympung ïalehkai ki khun samla naka bynta ban lum ban lang bad ban long ruh ka rynsan ïaki khun samla ka thaiñ kumba ka Basketball ka dei kawei naki jait jinglehkai kaba la sdang ban paw haka jylla bad bun naki khun samla ki ieid ïaka.
U la kyntu ruh ïaki khun samla ba kin pyndonkam hok ïaka sap ïalehkai kaba ki don lyngba katei ka lympung bad khmih lynti ruh ba ki khlur ïalehkai kin sa kiew na kawei ka rynsan sha kawei pat khamtam ban kiar naki kam sniew bad ki jingdih buaid.
Ha katei ka lympung naka liang ka Seng Samla kala pynshlur ruh da ka khunsnam kaba 50 hajar naka bynta ki lahduh haka liang ki shynrang bad 25 hajar naka bynta ka kynhun lahduh haka liang ki kynthei nalor kiwei kiwei ki khusnam.
