Shillong, Naiwieng 18: Ka National Institute of Fashion Technology (NIFT) Shillong hynnin ka sngi ka la plie ïa ka Artisan Awareness Workshop kaba lai sngi (17-19 Naiwieng 2025), kaba dei ka sienjam hapoh ka Tnad Textiles, Sorkar India. Ka prokram ka wanrah lang ïa 12 ngut ki nongtrei kti na ki kynhun shna tiar na Peren, Wokha bad Kigwema jong ka Nagaland, kiba la wad bniah mynshwa da ki samla pule ka NIFT ha ka Cluster Immersion Prokram jong ki ha u bnai Lber 2025.
Ïa kane ka prokram la plie paidbah ha ka jingïadonlang bad jingkyrshan jong u Director Dr. Shankar Kr. Jha, u CIC Bah Ksankupar Khongstit, bad Project Mentor Bah Siewspah Buhroy, kiba ka jingïalam jong ki ka la btin lynti ïa kane ka sienjam naduh ka jingwad bniah haduh ka jingpyntreikam. Ïa kane ka workshop la pynlong da ka tnad Fashion Management Studies jong ka NIFT Shillong.
Ka workshop ka thmu ban pyndap ïa ki jingduna kiba kongsan kiba la ithuh ha ka por ba ki samla pule ki lum jingtip shaphang ki rukom treikam tynrai, ki rukom saiñdur bad ki jingïadei bad ki ïew ki hat. Ha kine ki laisngi, ki nongtrei kti kin ïoh ïa ki jinghikai pyntbit ha kaba ïadei bad ka jingpynpawnam, ka PR & ka jingpynïaid ïew, ka jingpynïaid ïa ka jingpynpoi mar, ka jingnang jingstad ha ka liang ka pisa tyngka, ka jingpynmih ïa ki mar, ki skhim jong ka sorkar bad ki lad e-commerce. Ïa kine ki jingïalang la saiñdur khnang ban pynkhlaiñ ïa ka jingpynkhreh jong ki nongseng kam seng jam bad ban kyrshan ïa ka jingpynneh pynsah ïa ka ïew ka hat ha ka samoi kaba jrong na ka bynta ki kam seng kam seng jam kiba pynshong nongrim ha ki kam shna jingshna.
Haba ai jingkren ha ka jingïalang plie paidbah, u Director, Jha u la ban jur ïa ka jingbteng jong ka NIFT Shillong ban pynkupbor ïa ki nongtrei kti bad ban kyntiew ïa ki rukom shna tiar ba ïaineh. Da kaba plie lad ïa ka jingïasamlang ïa ka jingtip hapdeng ki samla pule, ki nonghikai bad ki nongtrei kti, ka jaka pule ka ïaleh ban tei ïa ki jingïadei kiba khlaiñ ha ka ïew ka hat bad ban kyntiew ïa ki lad kamai kajih na ka bynta ki nongtrei kti tynrai.
Ka Artisan Awareness Workshop kadei sa kawei pat ka sienjam kaba kongsan ha ka thong jong ka NIFT Shillong ban pynïasoh ïa ka jingstad tynrai bad ka rukom saindur ba mynta bad ki rukom treikam ka ïew ka hat, ban pynthikna ba ki kam shna jingshna tynrai kin dang ïai bteng ban kiew ha ka juk jong ka ïoh ka kot kaba nang kiew stet.
