Nongpoh, Ïaïong 01: Ka kynhun ki jaitbynriew Karbi ba shong ba sah ha ka jylla Meghalaya hapoh ka lama jong ka All Meghalaya Karbi Association (AMKA) mynta ka sngi ka la sdang ïa ka jingrakhe jong ka jingïaid lynti ba 50 snem ne ka jubili ksiar ba 3 sngi lynter bala pynlong ha ka shnong Purduwa ha Ri-Bhoi District hapdeng ka jingshongkun, ryngkat ka thong ruh ban wanrah ka jingïajan, ka jingïatylli bad ka jingïeid hapdeng ki jaitbynriew karbi kiba shong ba sah ha ka jylla.
Ïa ka jingrakhe Jubili Ksiar la plie pyrda bad pynher ïa ka lama da u MLA ka Nongpoh Bah Mayral Born Syiem uba la long kum u kongsan ryngkat ka jingdonlang ki nongïalam ka AMKA naduh u Bah OL Terang Chief Adviser, HS Engleng Senior Adviser, Robertjones Ronghang President, Bistocan Timung General Secretary bad kiwei kiwei lem bad ki longkmie longkpa, ki khun samla na kylleng ka jylla kiba la poi lang ha katei ka sngi.
La pynkup burom ruh ïa kiba bun ki nongïalam kiba la don bynta shibun ha kaba ïadei bad ki paid Karbi bad kumjuh ruh la pynlait ïa ka thup sah kynmaw jong ka jingïaid lynti ba 50 snem ka AMKA.
Haba kren kum u kongsan, u Bah Mayral Born u la pynpaw ka jingsngewnguh kaba khraw ïa baroh kito ki riew rangbah kiba don ka bynta kaba khraw ban pynurlong ïa katei ka jingrakhe namar ka dei ka kynhun kaba la ïaid lyngba shibun ki jingeh bad ki jingïaid lynti kim long kiba suk, namar ki don ki khep kiba pynduh mynsiem ïa ki nongïalam kumno ban pynïaid ïa ka kam, hynrei sngewkmen ba ki nongïalam naduh kiba mynshuwa haduh kiba mynta ki long kiba trei shitom bad kiba ïatylli ban pynthikna ba kane ka kynhun kan long ka jingmyntoi ban tehsong ïa ki paralok Karbi kiba don ha kane ka jylla.
U la ai ruh ka jingïaroh halor ka jingnang kiew sted ki paid Karbi ha ka jylla la ka long ha ka pule ka puthi bad bun ki liang khamtam ka jinglong kyrpang ka jong ki kumno ban pynneh pynsah ïa ka riti ka dustur ka kolshor tynrai.
U la ong ruh ba ki don shibun ki jaitbynriew kiba la jah noh bad kiba la ket ïa la ka tynrai hynrei lyngba kane ka jubili ksiar kan long ka jingkyrsiew thiah ban kum ka kynhun ki Karbi kan nang jam bad nang ïaid shaphrang ha ki kam ki jam khlem kynran dien naka bynta ka jingmyntoi bad khamtam ban tehsong ïa ki jaitbynriew Karbi kiba shong basah ha ka jylla.
