Shillong, Risaw 23: Ka lympung ïalehkai “31st State Karate Championship 2025” ba la pynlong da ka All Meghalaya Karate-Do Association (AMKA), ka la sdang ha ka sngi Palei, 23 tarik Risaw-2025, ha JN Indoor Stadium, Polo, ha ryngkat ka jingpyni sap kaba kyrpang jong ki khynnah ïalehkai kiba tbit ha kane ka jait jingïalehkai martial art.
Kane ka Championship ba la pynlong da ka AMKA ryngkat ka jingkyrshan jong ka tnad ïalehkai jong ka Sorkar Jylla Meghalaya, ka lumlang ïa ki nongïalehkai Karate na ki 8 tylli ki District ha nongbah Shillong ban ïashim bynta ha ki kyrdan ïakop bapher bapher.
Mynta u snem ki don 512 ngut ki nongïalehkai karate kiba la pynrung kyrteng na ka bynta kane ka lympung kaba lai sngi lynter, la ong u President ka AMKA u Bah Hunlang Lytan, ka jingkiew na ki 456 ngut kiba la ïashim bynta ha u snem ba la dep.
Ha ka jingïalang plie pyrda ïa kane ka lympung la pynlong ïa ka jingsngap jar kaba shi minit ban kynmaw burom ïa u nongseng jong ka AMKA u Stephan Leong, uba ka sngi ïap jong u ka hap ha kajuh ka sngi ba sdang ïa kane ka lympung mynta u snem. U la khlad noh ha ka 23 tarik u Risaw jong u snem 2011, hynrei yn ym lah ban klet ïa ka jingkordor jong u ha ka jingseng bad jingroi jong ka Karate ha Meghalaya bad ha ka thaiñ Shatei Lammihngi baroh kawei.
Ha kane ka sngi la wan Kongsan da ka Commissioner bad Secretary ka Kong Matsiewdor War Nongbri IAS, ha ryngkat u Joint Secretary ka Meghalaya State Olympic Association u Bah Pynbianglang Laloo kum u symbud kongsan.
Ka Kong Matsiewdor, kaba dei ka nongsiat khnam barim ba pawnam ka jylla, ka la ïaroh ïa ka AMKA kaba la pynlong ïa kane ka jingïakop haduh lai phew snem.
“Ka Karate ka la buh ïa ka tynrai kaba jylliew ha ka jylla jong ngi. Bun ki synjuk ïalehkai kim pat pynlong ïa ka state championship hynrei ka AMKA ka la leh ïa kane da kaba seisoh haduh 31 sien mynta,” la ong ka Kong Matsiewdor.
Da kaba shim jingmut na ka jingshem jong ka, ka kong Matsiewdor ka la ai jingmut ruh ïa ki nongïalehkai karate kiba la ïalum lang halor ka jingdonkam ban pyndonkam bha ïa ka por, ka jingpule jong ki bad kumjuh ruh ban ailad ïalade ïa ka por ban pynjahthait.
Ki spah ngut ki nongïalehkai karate kiba ïashim bynta, kiba bun kidei kiba dang shu sdang ha katei ka jingïalehkai katba kiwei pat ki la dep ban ïoh khur takma na ka bynta ka jylla ha ki rynsan ïakop ha ka thaiñ bad hapoh ka ri (regional & national event), la phiah kyrdan katkum ka rta bad ka jingkhia.
La pynlong ïa baroh ar ki jingïakop pyni jingtbit ha ka kumite (sparring) bad kata (choreographed movement demonstration) ha kane ka lympung.
