Jowai, Ïaïong 17: Ka 7-Aside Knock Out Football Tournament ba pynïaid da ka Sports & Games Committee jong ka Shnong Panaliar kala sdang ïa ka lympung ïalehkai jong ka, ha kane ka 16 tarik u Ïaïong ba la wan plie pyrda da u kongsan ma Justice Lyngdoh uba dei ruh u Waheh Chnong ka Shnong Rymbai EJH.
Hashwa kane la don ka jingïalang ba lyngkot ba la pynïaid da u Owaker Pasweth, Chairman, S&G Committee, la ïoh ruh ka jingkren na u Waheh Shnong Panaliar ma Riquoma Rq. Laloo uba la pynsngew ba ka jingïalehkai phutbol ka long kawei na ki lah ban pynïoh ha ka jingim u briew ïa ka met kaba koit ba khiah.
Na ka liang u kongsan jong kane ka sngi u Justice Lyngdoh haba kren ula ai ka jingïaroh ïa ki nongkitkam ka shnong Panaliar kiba la lah ban pynlong ïa kum kane ka lympung ïalehkai phutbol, ula ai mynsiem ïa ki nongïalehkai ba kin long kiba treishitom ha ki jingïakhun haduh ban da ïoh ïa ka thong jong ka jingjop, da kaba pynsngew ba ha ka jingïaleh kin don beit ki nongjop bad ki nongshah rem.
Katba ïa ki kyntien ai khublei la ïoh da u Sienmitre Sumer, Secretary, S&G Committee ka shnong Panaliar. Ha kane ka sngi la don lang u General Secretary ka shnong u Careme Phawa, u Treasurer ma Jait dao Sumer bad kiwei de.
Haba phai sha ka jingïakhun ba nyngkong hapdeng ka LMK FC pyrshah ïa ka Seiñ Kynjei FC kala long kaba itynnad bha namar haduh ba kut jong ka jingïakhun ka Seiñ Kynjei FC kala jop ïa ka LMK FC da 3-0 kol.
