Nongpoh, Nailar 20: Ka 40th Meghalaya State Badminton Championship 2025 kaba dei ka lympung ïalehkai Badminton ba heh haka jylla kala sdang mynta ka sngi ha NSCA Indoor Stadium, Umlyngkdait, bala wan ruh ban shim bynta shitrhem da ki rang bad ki thei ïalehkai kynthup ruh ki heprit na kylleng ki district jong ka jylla.
Ïa katei ka lympung la pynlong da ka Ri-Bhoi District Badminton Association bad la wan ban plie paidbah ïaka mynta ka sngi da u Bah Mayral Born Syiem MLA ka Nongpoh kum u kongsan bad u Abhilash Baranwal Deputy Commissioner ka Ri-Bhoi District kum u symbud kongsan haka jingdonlang u Bah Eric Dkhar BDO ka Umling C&RD Block, ki nongïalam ka RBDBA bad kiwei kiwei ki riew rangbah.
Haba kren ha katei ka sngi naka liang u Bah Mayral Born Syiem u la ai mynsiem ïaki rang bad ki thei ïalehkai ha katei ka sngi, wat hapdeng ka jingshit jong ka mariang hynrei ba kin lehkai bha namar kane ka long kum ka rynsan ïaki ba kin kiew shaphrang ha katei ka jait jinglehkai ban jam na uwei u mawjam sha uwei pat bad kyrmen skhem ba ki rang bad ki thei ïalehkai kiba tbit kin ioh ban lehkai sha kiwei pat ki lympung kiba kham heh wat shabar ka jylla.
U la ong ruh ba ka sorkar kala ïaleh katba lah ban lum ban lang ïaki nongïalehkai ban kyntiew ïaka kam lehkai haka jylla ban pynbiang ïaki jaka lehkai bad kumta ter ter bad ka shong haki samla ba kin minot bad kilan bha bad ban pyndonkam hok ïaka sap kaba ki don.
Naka liang u MLA u la ai ka jingkitbok ïa baroh ki nongïalehkai bad khamtam ïaka RBDBA kaba la shim ïaka sienjam ban pynlong ïa katei ka lympung kaba hap hapoh ka Meghalaya State Badminton Association.
