Nongstoiñ, Naitung 19: Ka jingjurip jong ki Regional Committee on Border Dispute kiba dei na ka liang jong ka sorkar Meghalaya, ba la khlieh da u bah Renikton Lyngdoh Tongkhar bad na ka liang jong ka sorkar kaba la khlieh da u Atul Bora, ki la pyndep ïa ka phase I katba ïa ka phase II pat kim pat sdang haduh mynta.
Ha kaba ïadei bad katei ka mat la ïoh ban ïakren bad ki riew rangbah na ka thaiñ Langpih ba kynthup ïa u bah u bad T.Nonglang na Mawsikar bad u bah P.Nongshlong na Mawïamsyiem, kiba la ong ba lada ki Regional Committee on Border Dispute ki la dei ban shimkhia bad ban pynkloi katba lah ban sdang noh ïa ka jingjurip ïa ka phase II khamtam eh ïa ka Langpih sector, namar ba ka dei ka jaka kaba ki jingïakajia ki mih man ka por hapdeng ki Nepali bad ki Khasi.
Ki la ong ruh ba dang ha u bnai Kyllalyngkot ba la dep, ka la don ka jingleit mushlia jong uwei u Nepali ha ka shnong Noapara kaba dei ka shnong Garo, kat haduh ba ka la pynmih ïa ka kynrum kynram hapdeng jong ki para nongshong shnong bad ka la poi haduh u pud ba ki la leit mudui da ka ejahar sha ki pulit ïa ki para nongshong shnong. Ki la ong ruh ba ka dei ka sien ba nyngkong, ba u Nepali un leit mushlia ha ki shnong Garo, namar da ki phew snem haduh mynta ym pat ju don ki Nepali kiba leit mushlia ïa ki shnong Garo.
Kitei ki rangbah ki la ong ruh ba mynta ka la dei ka por ba ki Khasi bad Garo kiba shong shnong ha katei ka thaiñ, ki la sdang ban ïatylli lang kawei bad shisien ba ki Khasi bad Garo ha katei ka thaiñ ki la ïa tylli, lada ki Nepali ki pyrshang ban wan mushlia ki kynrum kynram kiba jur kin mih bad kan wanrah ïa ka jing bym shngaiñ ha ka imlang sah lang.
Ki la ong ba baroh ki Garo naduh Bangjeng, Noapara, Dronpara, Mawïamsyiem haduh Kamphaduli, mynta ki la ïeng skhem triang ban sah beit ha West Khasi Hills bad da lei lei kin ym leit bad ka Assam. Dei halor katei ka nongrim ba lada ki Nepali ki leit mushlia kan buh ïa ki ha ka jingeh.
Kumta, lada ka sorkar ka kwah ba ki paidbah kiba shong ba sah ha ki jaka bad ki shnong kiba hap ha ka Langpih sector, kin shong suk haduh ban da pynbeit ïa u pud u sam uba thikna, ka la dei ban bthah ïa kitei ki Regional Committee on Border Dispute ba kin jurip noh kham kloi.
