Sdang jot biang ki ïing ba ladep shna, kylla jaka leh jakhlia, ngin ap tang mynta u snem, byrngem ka DS

Nongpoh, Naiwieng 09: Hadien bun phew snem ka jingsahteng ban aiti noh ïaki iing baduk sha kito ki longiing kiba duk ba rangli bad kiba shem jynjar ban shna iing, u MLA ka Nongpoh U Bah Mayral Born Syiem haka sngi Saitjaiñ u la leit ban jurip syndon ban iohi ïaka jinglong jingman jong kitei ki iing kiba la sdang ban shna naduh u snem 2011 lyngba ka skhim Integrated Housing Slum Development Project jong ka sorkar pdeng namar kitei ki iing haduh mynta kila shu kylla long tang kum ki iingjah bad ki jaka leh ïaki kam jakhlia ba lai phew jait.
Ha katei ka sngi ka jingjurip la sakhi ruh da ka jingdonlang u Bah CB Syiem Rangbah Shnong namar katei ka jaka ka dei ruh kaba la ai sngewbha da ka shnong Umbuda sha ka sorkar kaba don ruh ka jingheh kumba 8 akar naka bynta ban tei ïa kitei ki iing baduk.
Haba kren sha ki lad pathai khubor hadien ka jingleit jurip naka liang u Bah Mayral Born Syiem MLA ka Nongpoh u la ong ba kane ka project jong ka sorkar pdeng ka long ban pynioh iing ïa kito ki longiing kiba shem jingeh bad jynjar ban ioh ïaka jaka shong jaka sah, hynrei bun nakitei ki iing ki iing ki kylla iingjah noh bad kylla kum ki ktem awria ba ki paidbah ki ioh ban leh ïaki kam jakhlia ba laiphew jait.
U la ong ruh ba naduh u snem 2018 la sdang ban buddien ïa katei ka kam ha kaba ka sorkar jylla hadien ba kam don shuh ka jingbei pisa naka sorkar pdeng kala bei pisa nalade naka bynta ban maramot bad pynbha ïa kito ki iing kiba la sniew bad kumjuh ruh ban pyndep ïakiba dang sah ha ki bynta bapher bapher jong katei ka jaka bad bun naki iing kila sdang ban jot biang namar ym don ba shong ba sah bad kala don ka jingdkoh haka jingpyntreikam ïa katei ka skhim ban aiti ïa kitei ki iing sha kiba dei hok ban ioh bad kane ka jingjurip ka long ban pynthikna ba ka kam ka dei ban ïaid noh bad ban aiti noh sha kito ki longiing kiba dei hok ban ioh.
U la ong ruh ba ha kine ki taiew ban wan kum u MLA bad ka Dorbar Shnong kin sa pynbeit ruh ban ïakynduh bad ki ophisar ban ioh noh ka jubab kaba shai namar lada ki ieng sah kumne ki iing kila nang jot bad ki kam sniew kila nang roi, namarkata hap ban shim ïaka rai ba dei ban aiti noh ïa kitei ki iing bad ba dei ban don noh ki ban shong ban sah ha kitei ki iing.
U la ong ruh ba ka long ka jingpangmet ban beit ïaka jinglong jingman jong ki iing ki sem bad ka jinglong khlaw katei ka jaka, hynrei ngeitskhem ba ryngkat ka jingtreilang bad ka Dorbar Shnong kumba la ïaishah katta por bad kyrmen ruh ba kane ka dei ka sien ba khatduh ban ïakren ïa kane ka mat bad kyrpad ruh ïaka tnad ba dei peit bad ki ophisar ban shimkhia khnang ba kane ka kam kan urlong noh.
Naka liang u Bah CB Syiem kum u Rangbah Shnong u la pynpaw ka jingsngewkmen bad sngewnguh ïaka jingshimkhia u MLA ban jurip ïa kane ka project, namar kum ka Dorbar Shnong kala ud la nam naka por shaka por sha u Deputy Commissioner ka Ri-Bhoi District shaduh u Director ka Urban Affairs namar ïa kane ka project la sdang naduh u snem 2011 bad ha u snem 2014 la pyndep lut ïaka jingpyntrei ïaka wat ba nyngkong (1st Phase).
“Kum ka Dorbar Shnong ngi la thaid ban kren, ngi la thaid ruh ban ud bad dap ka jingbitar, namar ngi kwah ba ïaka roi ka par ba kan wan haka shnong ka thaw ban myntoi ki paidbah, hynrei lada ki paidbah kiba duk kim ioh, ngi kum ki nongïalam shnong ngi shah kren shah kynthoh nalor ba ngi pang ka mynsiem ba ki longiing kiba duk kiba dei hok ban ioh kim ioh bad kaba sngewsih shuh shuh kala long ba ha u snem 2017-18 ha kaba kila don ki nongshim kabu ban ïaleh ki kam sngewbha, ki kam awria bad ka jingpynjot ïaki iing ki sem” la ong u bah CB Syiem.
U la ong ruh ba ha kaba nyngkong naduh ki wire, ki pipe um bad ki jingkhang la dep pynjah ïaka 11 unit kaba la dep ban maramot haduh laisien laiwat, kaei ka daw pat kaba la pyndkoh ïaka rukom treikam bad ka jingbym lah ban aiti namar ka bording ruh kala don hakhmut hadien bala buh ruh ïa u transformer naka bynta ban pynpoi bording sha kitei ki iing, hynrei kaba sngewsih ka long ba ki longiing ba duk na katei ka shnong bad kylleng ki jaka ka Nongpoh Town kim ioh ki hap ban shu sah wai ban siew haka dor kaba ki shem jingeh.
Kum ka shnong kala byrngem ruh ba lada ym lah ban leh eiei hapoh une u snem 2025 kim banse ban leh noh da ka bor namar ka jaka ka dei ka jaka jong ka shnong, ka pisa ka sorkar ka dei ka pisa u paidbah ba lada ka sorkar kam lah ban leh eiei kum ki nongïalam shnong ki hap ban shimti hi ban aiti ïa kitei ki iing sha kiba dei hok ban ioh bad kyrmen ruh ba mynta ka kynti kan nym long ruh kum mynshuwa ba ka shnong ka shah ujor ejahar haka sorkar hadien ka shnong kala phah shong phah sah ïaki longiing baduk, namar ka dei ka jaka jong ka shnong, u la bynrap.