Nongpoh, Naitung 31: Shuwa ba ki paidbah kin kynjoh sha ka samoi ban pynthymmai biang ïa ki Nongmihkhmat na ka bynta ka election jied nongmihkhmat jong u snem 2023, ka TMC party ka la dang ioh bor ha Jirang Constituency kaba dei hadien ba ki nongïalam ka BJP, Congress bad UDP ki la wan ban pynïasoh sha ka TMC party.
Na ka liang ki nongïalam ka BJP, Congress bad UDP ki la wan ban pynïasoh sha ka TMC Party ka dei ha ka sngi Saitjaiñ ha ka jingïalang kaba la long ha Patharkhmah, ha kaba kitei ki nongïalam ki la wan ban pynïasoh sha ka TMC kaba ki pynpaw ba ki don ka jingkyrmen ïa kane ka party ba kan ïalam ïa ka sorkar hadien ka election 2023 hapoh ka jylla.
Kiba bun na ki nongïalam kiba la wan ban pynïasoh sha ka TMC ki dei na ka party BJP ha ka jingïalam u Bah Nesting Syiem kum u President barim ka BJP Jirang Mandal bad ruh u Vice President barim ka BJP na Ri Bhoi ryngkat kiwei de ki nongïalam na ka Congress bad UDP.
Ïa kine ki nongïalam la pdaing burom ba kin wan ban pynïasoh sha ka TMC party da u State Vice President ka TMC bad uba dei ruh u MLA ka Umroi, u Bah George B. Lyngdoh, u State Vice President ka TMC, u Bah James Lyngdoh, u Convenor bad u kyrtong ka TMC na Jirang, u Sunnymoon Marak bad kiwei kiwei ki nongïalam.
Haba kren ha kane ka sngi, kitei ki State Vice President ka TMC, u Bah George B. Lyngdoh bad u Bah James Lyngdoh ki la pynpaw ka jingkmen ba kat dang mih ki sngi bun ki paidbah ki la wan ban pynïasoh sha ka TMC party bad ka daw hi ka long ba ki sngewthuh ba ki don ka jingkyrmen ha kane ka party bad ruh ba ki nongïalam ba shemphang ban saiñdur ïa ka jylla ki don hapoh kane ka party.
Ki la ong ruh ba bun ki paidbah ki pyrshang ban pynsngewthuh bakla ïa kane ka party ba ki shemptieng ba tang ha ki khyndiat por kane ka party ka la suhthied hapoh ka jylla bad ka daw hi ka long ba ha kane ka party ki don ki nongïalam kiba shemphang bad kiba don ka jingiohi jngai ban kyntiew ïaka jylla.
Na ka liang u Bah George B. Lyngdoh bad u Bah James Lyngdoh kum ki nongïalam ba hakhlieh ka TMC hapoh ka jylla, ki la pynshai ruh sha ki paidbah halor ka nongrim jongka TMC party bad kane ka party ka dei ka party kaba trei na ka bynta ki paidbah ban wan rah ïa ka jingkylla ha baroh ki liang.
Kum ki nongïalam ki la kyrpad ruh ïa ki paidbah ka jylla ba kin ai ka jingkyrshan ïa kane ka party khnang ba kane ka party kan lah ban leh shibun ki kam kiba khraw na ka bynta ka jylla bad khamtam lada ki paidbah ki kloi ban kyrshan borbah kane ka party kan wan ha ka bor hadien ka election 2023 ba kan lah ban leh shibun ki kam kiba dei na ka bynta ka jingkylla hapoh ka jylla, ki la bynrap.
