Shillong, Ïaiong 01: U Myntri Rangbah ka Jylla Conrad Kongkal Sangma hynne ka sngi thohdieng, ula lum ïa ka jing ïalang bad ki heh sorkar na ka bynta ban iamir jingmut bad iasyllok halor ka jingïakren iasuk bad ka kynhun kiengatiar Hynñiewtrep National Liberation Council (HNLC).
Ha kane ka jingïalang bala pynlong bad u Ksiang sorkar Bah Peter S Dkhar, IAS bala shongthait, la iadonlang u Symbud Myntri Rangbah Bah Prestone Tynsong, Myntri kam Pohïing Bah Lahkmen Rymbui, Chief Secretary Kong RV Suchiang bad ki Heh Ophisar ka Sorkar Jylla.
Kane ka jingïalang kala long ruh tang hadien katto katne sngi ba ka HNLC akla rai ban thung ïa u President ka seng Hynñiewtrep National Youth Front (HNYF) Bah Sadon K Blah, kum u Nongmihkhmat ban buddien ïa ki kam ki jam sha ka jingïakren iasuk khlem ka jingbuh kyndon bad ka Sorkar.
Haba kren bad ki nongthoh khubor, u Conrad ula ong ba ka Sorkar kala kut jingmut ban pynïaid shakhmat ïa ka jingïakren iasuk bad ka HNLC.
“Kane ka dei akd aw ba ngi kwah ban pynthikna ba ka jingïakren ka dei ban don beit. Ngin ïai bteng ban tynruh ïa ka kam ba kan poi shaduh kaba kut” ula ong.
Haba pynpaw ba ka don da u pud ban ai ïa ki jingtip halor kane, u Conrad ula ong “Ka dei ka kam kaba ngi hap ban ai por bad ki don ruh ki kam kiba ngim lah ban pyntip. Nga sngewthuh ba phi kwah ban tip ïa kiei kiei baroh hynrei ka lah ban ktah pat ïa ka jingïakren bad ka jingïaid ka kam”.
Haba kylli la ka Sorkar kan pynbna shwa ïa ka soskular sangeh iasiat bad ka kynhun, u Myntri Rangbah ula ong “Ka long kaba eh ban ong ïa mynta namar ki dang don bun ki kam ba dang hap leh. Ngi kyrmen ba ngin lah pynïaid kloi shuwa ïa ka kam bad kane ka dei ka thong ka jong ngi”.
