Shillong, Jylliew 15 : Kat kum ka khubor ba la ïoh la ïathuh ba ka jingkren ïasuk hapdeng ki ksiang jong ka sorkar jylla, sorkar pdeng bad jongka seng HNLC ka la sdang ban ïaid shakhmat bad na ka liang ka sorkar ka kyrmen ba kane ka jingïakren kan long kaba seisoh.
Haba ïakren bad u Myntri ka tnad kam pohïing ka jylla u ma Lahkmen Rymbui u la pynpaw ka jingkyrmen skhem ba ka sorkar kan sa lah beit ban jop ïa kiba bun ki dieng pyngkiang khnang ba kane ka jingkren ïasuk bad ka seng HNLC kan long kaba jop.
“ To ngin ailad ba ka jingkren ïasuk kan ïaid beit. Ngi kyrmen skhem ba da ki jingïamir bad ïaphylliew jingmut bad jingai mynsiem lang jong ki seng bhalang bad baroh kiba ïadon bynta lang ngin sa jop ïa kino kino ki jingkhanglad ne diengpyngkiang khnang ban seisoh kane ka jingkren ïasuk” ong u ma Lahkmen.
U la ong ka long ruh ka kamram jong ki bor pulit ba kin peit ba ka shongsuk shongsaiñ kan ïai neh ïai sah ha kane ka jylla. Haba la kylli pat hato lyngba kane ka jingkren ïasuk tharai la pynkut noh ïaki kam kaikhlaw ne kieng atiar ha ka jylla, na ka liang u myntri um treh ban kynthoh halor kane hynrei u la shu ong to ngin ïakyrmen beit ia kaba bha bad ba ka shongsuk shongsaiñ kan ïai neh shirta ha ka jylla.
“ Ngam kwah ban jubab halor ki jingkylli ba shu mutdur lypa namar ngam kwah ban long u nongbatai lypa khamtam ha kaba ïadei bad ka jingkren ïasuk ka seng HNLC bad kaei ka ban mih na kata ha kaba kut” ong biang u ma Lahkmen.
Lah ban pynkynmaw ba ha u Lber mynta u snem ka sorkar kala thung ïa u bah Peter S Dkhar (Retd IAS) bad ïa u A.K Mishra Advisor MHA North East (Retd IPS) kum ki ksiang ban mihkhmat ïa ka sorkar jylla bad sorkar pdeng bad na ka liang ka seng HNLC ruh ka la thung ïa u President ka HNYF u bah Sadon K Blah ban long u ksiang jongka u ban mihkmat sha kane ka miej jingkren ïasuk.
