Shillong, Jylliew 02: Ka Bus kit khynnah skul ba nyngkong eh ba la pynbeit da ka sorkar ka la ïaid mynta ka sngi ban kit ïa ki Khynnah Skul na Umpling haduh Skul Pine Mount.
Kane kadei kawei na ki 30 tylli ki Bus kiba la thied da ka sorkar ban kit ïa ki khynnah skul kiba leit sha ki thaiñ Laitumkhrah bad kiwei kiwei de ki jaka. Ha kane ka Bus la pyndait lut ïa ki tiar ki tar, ki kor ki bor ha kaba ki kmie ki kpa, lyngba ka app ha ka Mobile ki lah ban hangno ka Bus ka la poi bad kilah ban buh seat lypa online. Ki don ruh ki CCTV kiba la pyndait na ka bynta ka jingshngaiñ jong ki Khynnah Skul.
Ka Bus kaba la sdang ïaid mynta ka sngi kaba mih na Umpling ka sangeh ban kit bad pynhiar khynnah skul ha ki 12 tylli ki jaka bad kine ki long ka Umpling Football Ground, Nongrah Presbyterian Church, Nongrah Mawshyieng, Nongrah, Lapalang Junction, Lumbatngen (Law U Sib), Demthring Bus Stop, Nongkhyriem, Nongthymmai, Jylli Shop, Fire Brigade, bad Pine Mount Back Gate.
Ïa kiwei pat ki Bus yn sa nang pynïaid khyndiat khyndiat.
Ka jingthmu ka sorkar ban pynïaid ïa kine ki Bus kadei namar ka jingkhapngiah palat ki surok haba leit on skul da ki kali rit da kaba pyndonkam da ki kali la jong ne ki kali ba shu wai.
