Shillong, Jymmang 7 : Ka jylla Meghalaya ka la sdang ban mad ïa ka jingduna doh masi namar ka jingpyndik palat ka Assam ban wan kit ïa ki masi sha kane ka jylla. Na ka liag ka seng Khasi Jaintia Butchers’ Association (KJBA) ka la kynnoh ba dei ka sorkar Assam kaba la pynwit bad pynthut ban pynpoi ïa ki masi sha kane ka jylla.
Kane ka thaiñ shatei lam mihngi ka dei kawei na ki thaiñ ba ki briew ki bam eh ïa ka doh masi bad ïa ki masi la wan kit na kiwei pat ki jylla kum na Bihar bad kiwei kiwei bad ïaid lyngba ka Assam. Hynrei na ka liang ka sorkar Assam ba la ïalam daka BJP ka la pyntreikam ïa ka Assam Cattle Preservation (Amendment) Act 2021 bad naduh ba pyntreikam ïa kane ka aiñ la pyrkhing ïa ka jingkhaïi ïa ki masi sha kane ka jylla Meghalaya bad sha kiwei ki jylla jong kane ka thaiñ.
Na ka liang ka KJBA ka la ther ruh ïa kane ka sorkar MDA ba la ïalam da u Conrad Sangma ba ka khlem shim khia ei ei ruh em ban peit bad ïakren bad ka sorkar Assam halor kane ka jingeh ba ki nongkhaïi masi ki ia kynduh. Na ka por sha ka por ka la leit ïakren bad ki bor sorkar ba kin shim khia ban ïakren bad ka Assam khnang ba kin ym pynthut ïa ka jingkhaïi masi hynrei kim shym la leh ei ei ruh em. “ Ngin sa ong ïa ka sorkar ba ka dei ban sangeh shisyndon ban ai ïa kita ki challan namar kan myntoi aiu ban don kita ki challan haba ki masi pat ym ïoh” ong u bah Generous Warlarpih General Secretary ka KJBA.
Kumba long mynta ïa ki masi la khaïi beaiñ sha ka jylla ha ka dor kaba rem bha bad lada kane ka sorkar kam shim khia ban ïakren bad ka Assam lehse kan poi ka por ban ym ïoh doh masi shuh ha kane ka jylla, ong biang une u nongïalam ka KJBA.
