Mawsynram, Risaw, 20: Katba nangïaid ki sngi ka jingpynkhreh na ka bynta ka elekshon jong u snem 2023 ka la ïaid shait shait ha kaba mynta ka sngi ka 20 tarik u Risaw, 2022 na ka liang ka Meghalaya Pradesh Trinamool Congress ka la ïoh ban pynlong ka jingïalang paidbah hapoh Mawsynram Block haba da ki spah ngut ki nongkyrshan ba thymmai ki la mih ban wan ïashimbynta ban sngap ïa ki jingpynshai na ki nongïalam.
Ïa kane ka jingïalang ba la pynlong mynta ka sngi hapoh jong ka Hall jong ka Seng Khasi Mawsynram ka dei hapoh ka jingbtin lynti jong u Batskhem Marbaniang kum u Convener bad u bah Gilbert Kharraswai kum u Secretary jong ka Trinamool Congress Mawsynram Block ha kaba ka jingthmu jong ka ka long ban pynshai bad pynsngewthuh paidbah ïa katto katne ki mat treikam jong party namar kane ka party ka dang dei ruh ka party kaba dang thymmai.
U Vice President jong ka Meghalaya Pradesh Trinamool Congress, u bah James Lyngdoh haba kren ha ka jingïalang nyngkong u la ai khublei na ka bynta ki nongïalam jong ka TMC Mawsynram Block kiba la trei shitom ban khot bad pynkohnguh ïa ki nongkyrshan ban wan sha ka jingïalang watla ka dang pynkha thymmai tang ha kine khyndiat bnai kata ha ka 5 tarik u bnai ‘Nailur, 2022. Ha kajuh ka por u la pynshai shuh shuh ba ka Trinamool Congress ka ïeng ha ka nongrim ha kaba kin rad-dyngkhong bad ban kyntiew shaphrang ïa ka imlang ka sahlang, ka roi ka par, na ka bynta ban pynneh ïa ka khyndew ka shyiap, bad pynneh ruh ïa ka riti ka dustur bad ka ban kdup lang ïa baroh ki jait niam hapoh jong ka Ri India.
U la ai jingpynshai ruh ba ka Trinamool Congress ka don ha ka ïa ka thong ban ïeng ha u paidbah naduh ka shynshar ka khaddar bad ka shaniah ha u paidbah ha kaba ïa kane ka party la seng da ka Mamata Banerjee kaba long mynta ka Myntri Rangbah duh jong ka West Bengal naduh u snem 1998, 1 tarik u Kyllalyngkot bad haduh kine ki sngi ka la nang ïoh mynsiem bad nang ïaid shaphrang ha kiba bun ki kam. U la ong ruh ba kane ka TMC ha kito ki snem ka la khlaiñ tang hapoh West Bengal hynrei ha 2016 ha ithuh da ka Election Commission jong ka Ri India kum ka ‘All India Trinamool Congress’ bad ruh la lah ban pynsaphriang ha kylleng ki jaka wat haduh hangne hapoh ka Jylla Meghalaya ruh.
Nangta, u la ong kane ka party ka don ruh ha ka ïa ka bynta ban kyntiew lem ïa ki khun samla kiba shem ki jingeh bad jynjar kiba bun bad watla kum ka party hapoh ka Jylla Meghalaya ka long ka party kaba dang lung bha hynrei katba nang ïaid ki sngi la sakhi ba ki nongïalam ki la nangtrei shitom ban pyntyllun ïa ki kam bad khot ruh ïa ki paidbah ban wan pynïasoh sha kane ka party ha kaba haduh mynta la dep ban pynrung ïa ka party TMC haduh 57 tylli ki konstitwensi bad kiba dang sah ki don sa tang ar ne lai tylli ki konstitwensi ki ban sa ïoh ban pynrung nongkitkam ha kine ki khyndiat bnai.
Ha ka jingkren jong u, u la ai ruh ka jingïaroh ïa u Dr. Mukul Sangma ryngkat ki nongïalam ba hakhmat jong ka party TMC kiba la trei shitom ha kaba ki la sdang ban pynsuhthied ym tang hapoh Ri Lum Garo hynrei wat ha ki lum Khasi ruh ka la sdang ban suh thied. “Ïa kane la sakhi ka jingsdang ban suh thied jong ka party TMC mynta ka long ha ka jingïalang ba la pynlong ha Mawsynram Block ha kaba kiba ki paidbah ki la sdang ban wan sngap ïa ki nongrim jong ka”, ong u bah James.
“Lada ka ktien kam im ka ri bad ka jaidbynriew ruh kam im”, ong u bah James, namarkata, u la ïathuh ba ym pat don ki MP kiba kren na ka bynta ki jingeh jong ka jaidbynriew khasi bad ki ban nud ban kren hapoh Parliament ban ong ba dei ban ithuh bad pynrung noh ïa ka ktien khasi hapoh ka khyrnit ba 8 jong ka Constitution jong ka Ri India, hynrei dei tang u MP jong ka ‘All India Trinamool Congress’ uba la nud ban leh ïa kata.
Kumta u la buh ka jingkyrpad na ka bynta ki nongtrei jong ka party ba nangne shakhmat kin nang wanrah shuh shuh ki nongkyrshan khnang ba ka Trinamool Congress hapoh Mawsynram Block kan ïoh ïa ka jingjop khnang ba u snem 2023 un dei u snem jong ka jingkylla.
U bah Gilbert Kharraswai, Secretary TMC ka Mawsynram Block Committee u la ong ba hadien ba la bishar bniah ïa ki seng saiñ pyrthei ha kane ka jylla jong ka sorkar MDA ba la lam khmat da ka NPP ka la long shisha ka sorkar kaba pynkhihwin ha baroh ki liang ha kaba ïa dei bad ka shynshar khaddar shibun ki jingeh kiba la mih ruh shibun ki jingïakhih kiba la sakhie ha kine ki snem ki bnai ba la dep. Namarakata, u la kyntu ba kum ki samla jong ka dong ka thaiñ Mawsynram kin phai khmat sha kane ka party TMC namar dei tang kane ka party ka ba lah ban weng ïa ki jingeh ym tang ha ka jylla Meghalaya hynrei wat ban ïeng ïaleh pyrshah ruh ïa kiwei pat ki National Party kum ka BJP kaba la shynshar mynta ïa ka Ri India.
Ïa ka jingïalang pynïaid da u bah Iohdor Diengdoh, Convener jong ka Meghalaya Pradesh Trinamool Congress, East Khasi Hills District ha ryngkat ka jingïadonlang naduh u Vice President jong ka Meghalaya Pradesh Trinamool Congress, u bah James Lyngdoh, u Joint Secretary jong ka All India Trinamool Congress, u Jayanta Sen lem bad kiwei de ki nongïalam.
Lah ban kdew ba kiba la wan pynïasoh mynta ka sngi sha ka Trinamool Congress jong ka Mawsynram Block ki long na ka INC, NPP, UDP katkum ka jingpynpaw jong ki nongkren ha ka jingïalang.
