Mawkyrwat, Jylliew, 19: Ka Kynhun ki Nongdie-doh Masi (KNM) kiba ju shong die doh ha Ïew Mawkyrwat, South West Khasi Hills District hadien 2 taïew ei ei jong ka jingkhang, mynta ka sngi ka 19 tarik u Jylliew, 2023 ki la ïoh ban sdang biang ban die ïa ka doh masi ha Ïew Mawkyrwat.
Lah ban kdew ba ka jingsangeh ban die soh jong kane ka kynhun ka long hadien ba ka la don ka jinghiar palat ka ïew ha kine ki taïew ba la dep bad kumjuh ruh ka jingwan lyngshop ka jingpang Lumpy Disease ïa ki Masi.
U bah Pailan Ramsiej, President jong ka Kynhun ki Nongot-doh Masi hapoh ïew Mawkyrwat haba kren ha ki lad pathai khubor u la pynshai paidbah kane ka jingsangeh ban ot doh masi kaba la neh ar taïew ei ei ka dei lyngba ka jinghiar palat ka ïew ha hat bad kumjuh ruh lah ban ong ba ka jingïoh kem pang ki masi ha kaba kiba bun ki briew ki la sngewthait ban wan thied doh masi. Kumta na ka liang ka Kynhun ki nongot-doh da ka jingïasngewthuh lang ki hap ban sangeh shwa ban die doh masi.
Namarkata, mynta ka sngi kaba dei ka 19 tarik u Jylliew, 2023 ki la shim pat ïa ka rai ban sdang biang ban ot doh masi da kaba ïa kut ban ïa ot tang ïa ki masi ki ba koid ba khiah ki bym shem la don kino kino ki dak jingpang ha ki.
Lah ong ruh ba kum ka Kynhun ki Nongot-doh masi ka kyntu ïa ki paidbah ba kim dei ban sngewsheptieng ban bam ïa ki doh masi namar baroh ka doh masi ki dei kiba biang kiba khlem don kino kino ki jing pang.
