Shillong, Jymmang, 04: Ka Flybig ka dei kawei na ki kompeni pyniaid Liengsuiñ kaba dang shu mih thymmai ha ka ri India bad ka la sdang ia ka jingshakri jong ka ia ki paidbah naduh u Kyllalyngkot 2021. Ha ka 2 tarik u Jymmang 2022 ka Flybig ka la pynïar shuh shuh ia ki thapniang jong ka sa ha nongbah Shillong, ka Flybig ka la ai jingshakri ha ki hynñiew tylli ki nongbah jong ka thaiñ Shatei Lammihngi, kata saw tylli ha Assam, ar tylli ha Arunachal Pradesh, kawei ha Tripura bad mynta pat kaba phra ka dei ha Shillong.
Ka jingdon jong ka Flybig kan pynsuk ia ki paid nongshong shnong kane ka Jylla Meghalaya khamtam kito kiba trei ba ktah bad kiba don ki kam ki jam ha nongbah Delhi naba ki lah ban leit ban wan wut wut khlem da tuh ia ka por kumba long ka Rel bad ka Flybig kan her na Shillong sha Delhi ha manla ki ar taiew.
Lyngba ka jingdon jong ka Flybig ki nongleit nongwan kin ym duhei ia ka por jong ki kaba kin hap ban duh kumba 600000 kynta lada ki leit da ka Rel bad kin duh kumba 90,000 kynta lada ki leit da kiwei pat ki liengsuiñ kata ka mut ba lada ki paidbah ki leit da ka Rel kan shim por ia ki 42 kynta katba da ka Flybig pat kan shim por tang 4 kynta duna, lada da kiwei ki liengsuin pat kan shim por ia ki hynriew kynta duna.
Ka Flybig ka la mang ba kan pynbiang 312 tylli ki jaka shong ha manla ka taïew ba ka leit bad ha ka shisnem pat ka la kheiñ ba kan kit 16,224 ngut ki briew.
Haba kren shaphang ka jingkiew sted jong ka Flybig bad ka jinglah jong ka ban pynïar sted ia ki thapniang jong ka sha ki bynta bapher jong ka ri India, u CMD jong ka u Captain Sanjay Mandavia u la pynpaw ka jingsngewkmen bad ka jingsngewsarong ba ka Flybig ka dei ka liengsuiñ kaba sted tam ban her bad kaba la lah ruh ban ai jingshakri ia ki lak ngut ki nongshong shnong jong ka ri India bad ka Thaiñ Shatei Lam Mihngi hi baroh kawei.
Ha kane ka sngi ka 2 tarik u Jymmang ba la plie paidbah ia ka jingshakri jong ka Flybig la pynbna ruh ia ka por iaid jong ka kata ba kan mih na Shillong ha ka por 9:20 baje mynstep bad kan poi ha Delhi ha ka por 12:25 mynsngi, nangta kan mih na Delhi ha ka por 12:55 bad kan poi biang sha Shillong ha ka por 4:20 baje janmiet.
La pyntip ruh ba ka dor jong ka bai leit bai wan lyngba ka Flybig kan sdang naduh naduh ka T.9998 tyngka bad kiwei pat ki khajna ba donkam ban ot.
