Shillong, Jymmang 09: Ka lympung ïalehkai First Divison ba pynïaid da ka Shillong Sports Association (SSA) kala wanphai bad sdang biang ha ka sngi Nyngkong (9-5-2022). Ha kane ka sngi ka jingïalehkai ka la long hapdeng ka Lawsohtun SC pyrshah ïa ka Imson SC ha Madan MFA, Polo, Shillong. Bad ha kane ka jingïalehkai ka Lawsohtun kala khur jingjop da kaba pynliem da 3-0.
Ka jingïakhun hapdeng kine ki ar tylli ki team ka long kaba itynnad bad ïakhaid bha baroh arliang kila ïakhun tyngeh ban thep kol, hynrei bun tylli ki kabu kila pynlehnoh ei. Dei tad hashwa ban kut ka kylla step (44min) u Eddy Dhar u la plie pyrda da kaba thep ïa ka kol kaba nyngkong na bynta ka Lawsohtun SC kaba la lamkhmat da 1-0.
Haba wanphai sha ka kylla miet, ka jingïakhun kala nang thnem ha baroh arliang, ki rangïalehkai ka Imson kila ïakhun tyngeh ban pynphai ïa kane ka shi kol hynrei ka khlem lah pat ban pyndep ha ka liang ka thep kol. Ka Lawsohtun SC kala ïoh mynsiem biang hadien ba u Pynkhrawkupar Kharbuli u la thep ïa ka kol kaba ar ha ka minit ïalehkai ba 51 minit.
Lyngba kine ki ar kol ka Lawsohtun kala nang ïakhun tyngeh khlem da ailad ïa ka jingpyrshang thep kol ka Imson SC bad khlem hun tang ïa ki ar kol ha kaba u Rohit Rosaily u la thep ïa ka shi kol ha ka minit ba 90 kaba pynlong ïa ka kynhun ban jop da 3-0 bad khur pura ïa ki lai point.
