Shillong, Jymmang 05: Ka jingshongshit ki katto katne ki kyrtong, kynthup ïa ki Sitting MLA ban ïakhun ïa ka elekshon MLA ha u 2023 mynta ka la sdang ban kynjah.
Ki khubor ba la ïoh lum, ki ïathuh ba ki don katto katne ki daw kiba la pynlong ïa kine kiba thmu ban mih madan na ka Party kaba ïalam ïa ka jingsynshar ha Meghalaya ban sngew artatien noh.
Ki tyllong khubor ki ïathuh ba kawei na ki daw baba pynlong ba kin artatien kadei namar ka jingkylla kynsan ka jingïapynbeit pud hapdeng ka Meghalaya bad ka Assam na ka jingïaroh sha ka jingshah kynnoh bad shah beiñ na kiba bun ki liang.
Kawei pat ka daw ba ki la ai ka long ba wat ka mat jong ka Them Metor kaba la i kumba yn lah ban pynbeit noh dang ha kine ki khyndiat bnai baladep, mynta ka i kumba ka kyllaiñ bad lah ban mad jingeh.
Nangta ki don ruh ki daw kiba kim da kwah ban pynpaw paidbah hynrei ki la ong ba kin shu sngap shuwa kumto.
“Kane ka ishu pynbeit khappud hapdeng ka Meghalaya bad ka Assam, i kumba kan kyrtoh kylla ïa ki Party kiba don ha ka sorkar, khamtam eh ïa ka NPP, namar ba u Myntri Rangbah, u Conrad Sangma udei u nongïalam ka Party bad u khlieh duh ka sorkar ha ka jylla”, la ong kine kiba kwah ban kynran dien noh bad kynthup ruh wat ïa ki Sitting MLA.
Ki la ong ruh ba ka jingïeng bad ka jingkhih pyrshah ki paidbah ha khappud kan ktah shibun ïa ka Party. Nangta ka jingpynpaw u Myntri Rangbah, u Conrad Sangma bad u Myntri Rangbah Symbud, u Bah Prestone Tynsong, baroh arngut ki nongïalam jong ka NPP ban ïeng beit halor ka nongrim jong ka MoU ba ladep ïasoi kan ktah shibun ïa ka Party ha ka elekshon 2023.
Dei halor kane ka nongrim ba kine kiba thmu ban ïeng ne mih ïakhun na ka Seng ki la kren artatien noh.
Lah ban kdew hangne ba ha kine ki bnai baladep, kiba bun ki nongmihkhmat khamtam ki MDC jong ka KHADC, ki la mih noh na ki Party ba ki don bad leit pynïasoh noh sha ka Seng NPP na ka bynta ban ïakhun ïa ka elekshon MLA ha u snem 2023. Kine ki long u Bah Teibor Pathaw na ka UDP, u Bah Fantin Lakadong na ka Congress, u Bah Bajop Pyngrope na ka Congress, u Kong Macdalyne S. Mawlong na ka PDF bad kiwei kiwei.
Wat ki san ngut ki MLA jong ka Congress kiba dang don hapdeng ka jingshah sospon ruh ki don kiba la ïoh khubor ba ki kwah ban ïakhun na ka NPP.
