SHILLONG, Lber 01: Ka jingïalehkai ba kyrpang na ki rangkawang ka la ïarap ïa ka Royal Cricket Club ban pynliem suk haduh 147 ron ïa ka Langsning CC ha kawei naki jingïalehkai jong ka Shillong Cricket League Super Division 2026 ba la pynïaid da ka Shillong Cricket Association, ha Polo ha ka sngi Saitjaiñ.
U Swastic Chettri (50 ron naki 75 bol) bad u Rajesh Tati (41 ron naki 27) ki la lamkhmat ïa ka Royal CC ban kamai 179 ron shuwa ban hap baroh 10 wiket haki 38.2 ober. U Bamanbha Shangpliang u la khur 3/22 naki 8.2 ober, katba u Prince Ray u la khur 2/32 haki 9 ober..
Haba jubab ka Langsning ka la khyllem noh baroh 10 wiket tang na ka bynta 32 ron haki 18.2 ober.
U Reshabh Dipak u la long u nongkawang bol ba seisoh tam, hadien ba u la khur 4/15 haki 9 ober bad u la shah jied ruh ban khur ïa ka khusnam Player of the Match.
