SCA Cricket League Super Division: Lyngba ka spah ron u Abhishek jop suk ka Langsning ïa ka Sputnik Spartans

SHILLONG, Lber 10: Ka spah ron na u Abhishek Kumar (100) ka la ai mynsiem ïa ka Langsning CC ban pynliem da 129 ron ïa ka Sputnik Spartans CC ha ka jingïalehkai jong ka lympung Shillong Cricket League Super Division 2024-25, ba la pynïaid da ka Shillong Cricket Association ha madan Polo, hynne ka sngi Nyngkong.
Hadien ba jop ïa ka jingkynting pisa (toss) ka Langsning CC ka la rai ban tied nyngkong, ha kaba ka la lah ban kamai 241 ron haduh kaba kut jong ka 45 ober bad hap 5 wiket. U Abhishek Kumar u la long uba kongsan tam ha ka tied da kaba kamai 100 ron naki 103 bol, katba u Riboklang Hynniewat u la kyrshan da kaba kamai 72 ron naki 81 bol. U Dilwar Khan u la khur 2/44 naki 9 ober, katba u Supriyo Chanda u la khur 1/48 naki 7 ober.
Haba pyrshang ban jubab ka Sputnik Spartans ka la shah khanglad noh tang na bynta 112 ron naba khyllem baroh 10 wiket haki 25.4 ober, dei tang u Sameer Thapa (30 ron naki 23 bol) bad u Supriyo Chanda (28 ron naki 22 bol) kiba la kham seisoh ha ka tied.
Napdeng ki rangkawang bol, u Aaron Adharsh roy Nongrum u la khur 4/20 naki 6 ober, nangta u Riboklang Hynniewat u la khur 3/26 naki 6.4 ober, kaba la ïarap ïa ka kynhun ban jop kput haduh 129 ron. ïa ka nam Player of The Match la khur da u Abhishek Kumar uba la kamai ïa ka spah ron.