SHILLONG, Rymphang 11: Ka Sporting CC ka la ïoh mad ïa ka jingjop ha ka Cricket League Super Division 2026 jong ka Shillong Cricket Association (SCA) hadien ba ka la pynliem noh da 3 wiket ïa ka Lok bhawan CC hynne ka sngi Balang.
Haba tied nyngkong hadien ba jop ïa ka jingkynting pisa (toss) ka Lok Bhawan ka la shah pynkhyllem noh baroh shiphew ngut ki nongtied na ka bynta 191 ron haki 35.3 ober, ha kaba u Vishal Kanwar (59 ron naki 74 bol) bad u Ayushman Das (58 ron naki 73 bol) kidei kiba la lamkhmat ha ka tied.
Hynrei ka jingïalehkai ba kyrpang ka la wan na u Gagandeep Singh jong ka Sporting CC, ha kaba u la weng 5 wiket marwei naki 7 ober bad ailad tang 37 ron, katba u Indrajit Rai u la khur 3 wiket naki 7 ober bad ailad 45 ron.
Nangta ka Sporting CC ka la pyndep ïa ka kamram ban kamai 192 ron na bynta 7 wiket haki 41.4 ober ban khur ïa ka jingjop. U Rohan Kumar Bidaria u la noh synñiang 68 ron naki 90 bol, katba u Purav Agarwal u la kamai 28 ron naki 32 bol.
Ha kaba kut u Gagandeep Singh u la ïoh ban khur ïa ka khusnam Player of the Match hadien ba u la ïarap 9 ron ha ka por tied bad weng 5 wiket ha ka boling.
