SHILLONG, Rymphang 15: Ka Royal CC ka la khur jingjop ha kawei na ki jingïalehkai jong ka lympung Shillong Cricket League Super Division 2026 ba la pynïaid da ka Shillong Cricket Association (SCA) hadien ba ka la pynliem noh da 129 ron ïa ka Lumpyngngad SSCC hynne ka sngi U Blei.
Haba tied nyngkong hadien ba jop ïa ka jingkynting pisa (toss) ka Royal CC ka la buh ïa ka thong kaba 241 ron bad hap 8 wiket haki 45 ober. U Swastic Chettri u la lamkhmat ha ka tied da kaba kamai 81 ron naki 90 bol, katba u Tarique Anwar Siddique u la noh synñiang 76 ron naki 75 bol.
Napdeng ki nongkawang bol kiba kham seisoh jong ka Lumpyngngad SSCC ki long u Mukesh Kumar Rai (8 ober: ailad 52 ron: khur 3 wiket) bad u Vishal Kumar Balmiki (9 ober: ailad 62 ron: khur 2 wiket).
Ha ka pali tied jong ka Lumpyngngad SSCC, u Samir Shah u la kamai 32 ron naki 30 bol, katba u Shomraj Paul u la ïarap 26 ron naki 15 bol, hynrei ka kynhun ka la hap noh baroh 10 wiket tang na ka bynta 112 ron haki 23.1 ober.
Kiba la trei borbah ha ka boling na ka bynta ka Royal Cricket Club ban ïalam sha ka jingjop ki long u Bipin Ray uba la khur 3/26 naki 6 ober bad u Raj Biswa uba la khur 3/46 naki 9 ober.
Na ka bynta ka jingïalehkai kaba kyrpang ha baroh ki long, u Raj Biswa (kamai 30 ron ha ka tied bad pynhap 3 wiket ha ka boling) u la ïoh ban khur ïa ka khusnam Player of the Match.
