SHILLONG, Lber 28: Ka Sputnik CC ka la lah ban pynliem salit da 2 wiket ïa ka Nongmensong CC ha kawei na ki jingïalehkai jong ka lympung Shillong Cricket League Super Division 2024-25, ba la pynïaid da ka Shilong Cricket Association, ha madan polo, hynne ka sngi Thohdieng.
Hadien ba jop ïa ka jingkynting pisa (toss), ka Nongmensong ka la rai ban tied nyngkong, bad ka la lah ban pyndep pura ïa ka 45 ober ba la mang da kaba kamai 212 ron bad khyllem 7 wiket. U Jaskirat u la kamai 50 ron naki 69 bol, katba u Raghav u la tied 30 ron naki 30 bol.
Kiba la seisoh napdeng ki rangkawang bol jong ka Sputnik, u Gurinder Singh u la khur 3/31 naki 9 ober, katba u Md Nafees Siddique u la khur 2/49 naki 9 ober.
Ka Sputnik ka la lah ban kamai 216/8 naki 43.2 ober ban jop ïa ka jingïakhun da 2 wiket. U Arien Bonchang u la lamkhmat ha ka tied da kaba kamai 61 ron naki 108 bol, nangta u Swarajeet Das pat u la kamai 44 ron naki 54 bol.
Watla u Anish Charak (khur 2/32 naki 8.2 ober) bad u Hinam Phukan (khur 2/32 naki 9 ober) ki la lehkai bha ha ka bowling hynrei kim shym la lah satia ban khanglad ïa ka liang pyrshah ban poi sha ka thong. ïa ka nam Player of The Match la khur da u Gurinder Singh.
