SHILLONG, Nohprah 07: Ka Governor House Xl bad ka AGES ki la jop ïala ki jong ki jingïalehkai ha ka lympung kriket 3rd Division 2025 ba la pynïaid da ka Shillong Cricket Association, kiba la long ha ka sngi Saitjai, 06 tarik Nohprah, 2025.
Ka Governor House Xl ka la jop da 45 ron pyrshah ïa ka Dynamite CC, katba ka AGES ka la pynliem da 5 wiket ïa ka BSF Warrior.
Ka Governor house Xl ka la buh ïa ka thong kaba 151 ron bad hap 9 wiket haki 20 ober hadien ba ka la jop ïa ka jingkynting pisa (toss) bad shimti hi ban tied nyngkong. U Sunil u la lamkhmat ha ka tied da kaba kamai 35 ron naki 17 bol. U Jitendar Thakur jong ka Dynamite u la khur 3/24 naki 4 ober.
Haba pyrshang ban jubab ka Dynamite ka la shah pynkhyllem noh baroh shiphew wiket tang na ka bynta 106 ron haki 17.2 ober.
U Binay Kumar Mahato u la long u namtam ha ka boling na ka bynta ka Governor House Xl, ha kaba u la khur 4/25 naki 4 ober kaba la ïarap ïa ka kynhun ban jop da 45 ron bad kaba la pynlong ruh ïa u ban khur ïa ka nam ‘Player of the Match.
Ha ka jingïalehkai kaba bud, ka BSF Warrior ka la kamai 120 ron bad hap 9 wiket haduh kaba kut jong ka 20 ober, u Abhishek Kumar u la kamai 44 ron naki 41 bol. U Bobier, rangkawang bol jong ka AGES, u la khur 2/7 ron naki 4 ober.
Haba jubab ka AGES ka la kamai 123 ron na bynta 5 wiket haki 16.2 ober ha kaba u Kroney b Marak u la btin lynti ïa ka kynhun da kaba kamai 44 ron naki 36 bol, hynrei ïa ka nam Player of the Match la khur da u Bobier.
