SHILLONG, Nohprah 01: Ka Youngstar bad ka Turshaprang ki la jop ïa la ki jong ki jingïalehkai ha ka Shillong Cricket League 2025, kiba la long hynne ka sngi Nyngkong. ïa kane ka lympung la pynlong da ka Shillong Cricket Association.
Ka Youngstar ka la pynliem noh da 2 wiket ïa ka Occult CC ha ka jingïalehkai kaba nyngkong shuwa ba ka Turshaprang kan jop da 72 ron ïa ka Laitkor CC.
Hadien ba jop ïa ka jingkynting pisa (toss) ka Youngstar ka la aiti ïa ka Occult ba kan tied nyngkong, ha kaba ka la kamai 101 ron bad hap 9 wiket haki 20 ober. Ki nongkawang bol ba seisoh jong ka Youngstar ki long u Ayush (2/8 naki 3 ober) bad u Shadab Alam (2/30 naki 4 ober).
Ka Youngstar ka la donkam tang 14.5 ober ban pyndep, da kaba kamai 104 ron na ka bynta 8 wiket. U Habibullah (27 ron naki 20 bol) bad u Shadab Alam (25 ron naki 13 bol) ki la long kiba kongsan tam ban ïalam ïa ka Youngstar sha ka jingjop. ïa ka nam Player of the Match la khur da u Shadab Alam.
Ka jingïakhun kaba bud la ïohi ïa ka Turshaprang kaba la kamai 235 ron ha ki 20 ober da kaba duh noh 5 wiket. Kiba la noh synñiang borbah ïa ka kynhun ki long u Raimon (72 ron naki 30 bol) bad u Ruddystar Shangpliang (58 ron naki 29 bol).
Ha ka jingpyrshang ban jubab, u Kerlang Nongrum u la kamai 90 ron naki 53 bol hynrei kam shym la biang satia ïa ka Laitkor ban poi sha ka thong, katta da tang 162/7 naki 20 ober.
Nalor ba seisoh ha ka tied u Rudystar u la ïoh ruh ban khur 3 wiket ha ka boling kaba pynlong ïa u ban khur ïa ka nam ‘Player of the Match’.
