SHILLONG, Nohprah 02: Ka Super Challanger bad ka Mawsyiem CC ki la jop ïa la ki jong ki jong ki jingïalehkai ha ka lympung SCA Shillong Cricket League 2025 kiba la long hynne ka sngi Ba-ar. Ka Super Challanger ka la pynliem noh da 70 ron ïa ka FSB shuwa ba ka Mawsyiem CC kan jop da 7 wiket pyrshah ïa ka Jong Ngi CC.
Haba phai sha ka jingïalehkai kaba nyngkong, hadien ba jop ïa ka jingkynting pisa (toss) ka FSB ka la aiti ïa ka Super challanger ba kan tied nyngkong, kaba la pyndep ïa ka pali tied da kaba kamai 167 ron shuwa ban khyllem baroh 10 wiket haki 20 ober.
Ki nongtied kiba la noh synñiang borbah ïa ka kynhun ki long u Kyrmen Skhem (68 ron naki 32 bol) bad u Isaian kurban (22 ron naki 19 bol), katba ki rangkawang bol kiba seisoh na ka FSB ki long u Shubro Dutta (3/24 naki 4 ober) bad u Sampad Dutta (1/21 naki 4 ober). Hynrei haba pyrshang ban jubab ka FSC ka la shah pynkut noh tang na bynta 97 ron haki 20 ober
U Vishal Kumar, uba la khur ïa ka nam Player of the match, ha kaba u la khur haduh 5/30 naki 4 ober.
Ha ka jingïalehkai kaba bud la ïohi ïa ka Jong Ngi CC kaba la shimti ban tied nyngkong hadien ba jop ïa ka jingkynting pisa (toss), bad kamai 105 ron shuwa ban khyllem baroh 10 wiket haki 20 ober. U Pynshngain Rymmai u la noh synñiang 41 ron naki 35 bol. U Pynsuk Nongsiej, u la long u nongkawang bol ba seisoh tam jong ka Mawsyiem, da kaba khur 2/19 naki 4 ober.
Ka Mawsyiem ka la duh tang 3 wiket ha ka lynti ban kynjoh ïa ka thong, da kaba kamai 110 ron haki 14.3 ober. U Wanaibok u la lah ban kamai 29 ron naki 23 bol ha kaba ka Mawsyiem ka la jop ïa ka jingïakhun da 7 wiket. ïa ka khusnam Player Of The Match la khur da u Pynsuk Nongsiej, uba la kamai 16 ron (not out) ha ka tied bad khur 2 wiket ha ka boling.
