Shillong, Nohprah 03: Ka Momentum CC bad ka Uplifter Alternative ki la jop ïa la ki jong ki jong ki jingïalehkai ha ka lympung SCA Shillong Cricket League 2025 3rd Division kiba la long hynne ka sngi Balang (03 tarik Nohprah, 2025).
Ka Momentum ka la pynliem noh da 3 wiket ïa ka United Brothers katba ka Uplifter Alternative ka la jop suk haduh 109 ron ïa ka Knight Dive.
Hadien ba jop ïa ka jingkynting pisa (toss) ka Momentum ka la jied ban bol nyngkong bad ka la lah ban pynkhyllem ïa baroh 10 wiket jong ka United Brothers tang na ka bynta 151 ron haki 17.1 ober. Dei tang u Ravishankar uba la kham seisoh ha ka tied da kaba kamai 23 ron naki 11 bol. Katba u Wansuklang Shullai rangkawang bol jong ka Momentum, u la ïoh ban khur 4 wiket bad ailad tang 13 ron naki 4 ober.
Ka Momentum ka la pyndep ïa ka thong da kaba kamai 152 ron haki 17.1 ober bad hap 7 wiket, ha kaba u Wansuklang Shullai, uba la khur ïa ka nam Player Of The Match, u la noh synñiang da kaba kamai 38 ron naki 24 bol, kaba la pynthikna ïa ka kynhun ban khur ïa ka jingjop da 3 wiket.
Ha ka jingïalehkai kaba bud, ka Uplifter Alternative ka la shimti ban tied nyngkong hadien ba jop ïa ka toss bad ka la lah ba kan kamai 170 ron shuwa ban khyllem baroh 10 wiket haki 20 ober. U Arjun Podal u la lamkhmat ha ka tied da kaba kamai 73 ron naki 52 bol.
Na ka liang jong u Anil Thapa, rangkawang bol jong ka Knight Dive, u la khur 3/18 naki 4 ober. Hynrei ka kynhun kam shym la lah ban shan skhem ha ka tied, ha kaba baroh shiphew ngut ki la shah pynhap noh tang na ka bynta 61 ron haki 13.2 ober, kaba la pynlong ïa ka kynhun ban shah rem kput haduh 109 ron.
U Dominic K Syiemiong u la ïoh ban pynhap 4 wiket naki 3 ober hynrei ïa ka nam Player of the Match la khur da u Arjun podal, uba la kamai 73 ron ha ka tied bad khur 1 wiket ha ka boling.
