SHILLONG, Kyllalyngkot 12: Ka Malki ka la lah ban pynliem noh da 27 ron ïa ka Nongkseh ha ka jingïakhun ïa ka lympung Shillong Cricket League 1st Division 2026 jong ka Shillong Cricket Association kaba la long hynne ka sngi Nyngkong, ha madan kriket, ha Polo.
Haba phai sha ka jingïalehkai, ka Malki ka la buh ïa ka thong kaba 139 ron shuwa ban khyllem baroh 10 ngut ki nongtied naki 39.2 ober. Kiba la lamkhmat ha ka tied ki long u Nick Dann (35 ron naki 43 bol) bad u Wellmanson Passah (34 ron naki 36 bol).
Ki rangkawang bol jong ka Nongkseh, u Richmond Nongdhar u la khur 3 wiket bad ailad tang 30 ron naki 7 ober, katba u Bushbashisha Tohtih u la weng 2 wiket bad ailad 33 ron naki 8 ober.
Hynrei haba wan ban beh ïa ka thong ka Nongkseh ka la shah pynkhyllem baroh ki nongtied tang na ka bynta 112 ron haki 38 ober. Watla na ka liang jong u Mickey Marngar (26 ron naki 50 bol) bad u Banpynshngiñ (20 ron naki 33 bol) ki la pyrshang katba lah ban pynpoi sha ka thong hynrei kam shym la biang ïa ka kynhun ban kynjoh ïa ka thong ba la buh.
Na ka liang u Sylvester Mylliempdah u la khur 2 wiket bad ailad tang 23 ron naki 8 ober, hynrei ïa ka nam Player of the Match la khur da u Deibormi Rangad, hadien ba u la khur 4 wiket bad ailad tang 26 ron naki 8 ober ha ka boling, kaba la ïarap ïa ka Malki ban pynthikna ïa ka jingjop da 27 ron.
