SHILLONG, Kyllalyngkot 20: Ka Donkins CC ka la khur ïa ka jingjop ha ka Shillong Cricket League 1st Division 2026 jong ka Shillong Cricket Association kaba la long hynne ka sngi Ba-ar hadien ba ka la pynliem noh da 61 ron ïa ka Winds.
Ka jingïalehkai ka la sdang ha kaba ka Winds ka la aiti sha ka Donkins CC ba kan tied nyngkong. Hangne la ïohi ïa ka Donkins kaba la lah ban kamai 167 ron shuwa ba baroh 10 wiket kin khyllem noh haki 37.5 ober.
Kiba la lamkhmat ha ka tied ki long u Agreas Cham Cham (31 ron naki 35 bol) bad u Rohit Raii (30 ron naki 40 bol). Na ka liang ki nongkawang bol jong ka Winds, u Keny Wann (8 ober ailad 37 ron) u la khur 3 wiket, katba u Pritam Singh (7 ober ailad 20 ron) u la khur 2 wiket.
Haba pyrshang ban jubab, ka Winds ka la shah pynkut noh tang na ka bynta 106 ron naba khyllem baroh 10 wiket haki 25.2 ober, ha kaba u Bhuwan Thapa u la tyngshaiñ ha ka boling da kaba khur 4 wiket naki 7.2 ober bad ailad tang 28 ron, kaba la pynlong ïa u ban khur ïa ka khusnam Player of the Match. U wei pat u nongkawang bol jong ka Donkins, uba kham seisoh udei u Terry Dkar (2/10 naki 4 ober).
