SHILLONG, Rymphang 12: Ka spah ron jong u Raj Biswa ka la ïarap ïa ka Royal Cricket Club ban pynliem suk haduh 127 ron ïa ka Nongthymmai SCC ha ka jingïalehkai jong ka lympung Shillong Cricket League Super Division 2026 ba la pynlong da ka Shillong Cricket Association, hynne ka sngi Palei.
Haba tied nyngkong hadien ba jop ïa ka jingkynting pisa (toss) ka Royal Cricket Club ka la kamai 308 ron shuwa ban khyllem noh baroh 10 wiket haki 38.4 ober, ha kaba u Raj Biswa u la trei borbah ban khyrwit haduh 124 ron naki 65 bol, katba u Pringsang Sangma u la kamai 32 ron naki 24 bol.
Kiba la kham seisoh ha ka boling jong ka Nongthymmai SCC ki long u Ram Najiar (6.4 ober: ailad 46 ron: khur 3 wiket) bad u Badonam John Mylliemngap (6 ober: ailad 51 ron: khur 2 wiket).
Hynrei haba pyrshang beh ïa ka thong, ka Nongthymmai SCC ka la khyllem noh baroh 10 wiket tang na ka bynta 181 ron haki 37.2 ober. Kiba la noh synñiang bun ron ïa ka kynhun ki long u Shankar Balasubramaniam (52 ron naki 78 bol) bad u Sagar Chettri (31 ron naki 36 bol).
Nalor ba u la lehkai bha ha ka tied, u Raj Biswa u la wanrah ïa ka jingïalehkai kaba kyrpang ha ka boling, da kaba khur 3/45 naki 8.2 ober, kaba pynlong ïa u ban khur ïa ka khusnam Man Of The Match, uwei pat u nongkawang bol jong ka Royal Cricket Club uba la seisoh udei u Abhishek Kumar, da kaba khur 3/18 naki 6 ober.
