Sawa ka sur jingrwai ‘Ri Khasi’ ha ka sngi pynkut ka jingïakhih dawa jylla thymmai ka HSPDP ha New Delhi
Nongstoiñ, Nohprah 15: Ka jingïakhih da kaba jai jai ban dawa jylla ban ïoh ïa ki jylla ba thymmai jong ka National Federation of New State (NFNS) kaba ïalam da u Professor Munish Tamang, kaba kynthup ïa ki shiphew tylli ki jylla ka thaiñ shatei lam mihngi, kaba la sdang ha ka sngi balang ka 14 tarik Nohprah ha madan Janatarmantar ha Nongbah Delhi, ka la kut noh mynta ka sngi palei ka 15 tarik Nohprah.
Katei ka jingïkhih ka la sdang ha ka por shiphew baje mynstep haduh saw baje janmiet bad mynta ka sngi palei ruh ka la sdang biang ha ka por shiphew baje mynstep. Ha ka sngi ba pynkut ïa ka jingïakhih, la ïoh ïa ka jingkren na u Professor Munish Tamang president ka NFNS, u bah Nickman Marak Chairman ka Garo State Movement Committee bad u bah K.P.Pangñiang president ka HSPDP.
Mar shu kut ka jingkren, baroh ki nongïalam ki la ïapyrta jam “No Khasi Jaintia Sate No Rest”. Hadien ka jingpyrta jam bunsien bun wat bad katba ki longkmie jong kiwei pat ki jylla kiba don lang kum ki dkhot ha ka NFNS ki dang ïa kyrkait bad pyrta, ka kynhun jong ki nongïalam jong ka HSPDP bad ka Garo National Council ki nang pynsawa ïa ka sur jong ka jingrwai ieit ri, “Ri Khasi Ri Khasi nga ieit ïa pha”.
Hadien ba la pynkut ïa ka jingïakhih baroh dkhot ki la ïatai sani bha bad da kawei ka sur ki la rai ba katba ka sorkar India kam pat pynurlong ïa ki jingdawa kin ym sangeh ban ïakhih na ka por sha ka por. Ki la rai ruh ba wat lada wan kano kano ka sorkar la ha Delhi ne ha ki jylla jong ki, kin ïai pynsgew.
U Professor Munish Tamang u la ong ba katba ym pat ïoh ïa kitei ki jingdawa, un ïai trei shitom ban un nang pynsngew-thuh shuh shuh sha ka sorkar India ba ka dei ban pynurlong, namar ka por ka dla ei hok ba kin ïoh ïa ki jylla da kaba pynshong nongrim ha ka ktien ka thylliej bad ka kyrteng jong ki jaitbynriew.
U bah Nickman Marak Chairman ka Garo State Movement Committee (GSMC), u la ong ba ka GNC bad ka HSPDP kin dang ïai ïakynduh man ka por, na ka bynta ban ïapyrkhat halor katei ka jingkwah ban phiah noh ïa ka Meghalaya ha ki ar tylli ki jylla ba thymmai, na ka bynta ba ka pateng ban wan jong ki khun ki ksiew kan kiew sted ha baroh ki liang.