Nongpoh, Ïaïong 04: Shuwa ba ki paidbah ka jylla kin kynjoh sha kata ka samoi ban pynthymai biang ïa kita ki nongmihkhmat sha ka ing thaw ain hapoh ka jylla kaba dang don por mynta sa shi snem ei ei, uwei u samla na ka dong Ri Bhoi ba la tip kyrteng kum u Samla Albert Maring u la mih shakhmat ban ïa kren halor kane ka phang bad katkum ka jingangnud utei u samla u la pynpaw ba ha kane ka kynti ki paidbah ka Ri Bhoi ki la dei ban phai khmat noh sha ki kyrtong kiba dei hi ki trai Ri Bhoi bad kiba la kha la pun bad ba kiba la hap sohpet ha Ri Bhoi District.
Kum ban pynpaw, u Samla Albert Maring, u dei u samla ba shong bas ah ha ka ka Shnong Umdap Dumu ba hap ha ka Nongpoh Constituency ha Ri Bhoi District bad kum u samla u la mih shakhmat ban kren halor ki jinglong jingman ha Ri Bhoi ba u kwah ba ha kane ka election 2023 ka dei ban don ka jingkylla bad ba ki paidbah Ri Bhoi ki la dei ban ailad noh da ki kyrtong kiba dei hi na ka Ri Bhoi District.
Haba ïa kren bad u Mawphor, u samla Albert Maring, u la ong ba ka Ri Bhoi District kam dei shuh kta ka District kaba dang duna ïa kita ki nongïalam kiba la biang ka jingnang jingstad bad kiba la tbit ruh ban long kita ki mihkhmat sha ka ing dorbar thaw aiñ hapoh ka jylla bad kaei kaba sngewsih ka long ba ki paidbah ki dang kwah ban jied ïa kita ki kyrtong kiba wan nabar bad kiba wan ban pynbiej ïa ki paidbah tang ha ka por election.
U la ong ruh haba kren halor kane ka kam ban jied ïa ki nongmihkhmat kam shym mut tang ban jied ïa kita ki MLA ba ka election MLA shen kan sa long ha ka jylla bad kane ka kynthup ruh ban jied wat ïa ki MDC kiba dei hi na Ri Bhoi bad ym shuh ban dang biej ïa ki kyrtong kiba wan na shabar ka District.
“Nga kren ruh halor kane ka bynta kam shym mut ba nga kwah ban wan rah ïa ka jingïapher jaid bynriew ne ka jingïapher jaid, hynrei kino kino kiba dei hi ki trai ki don ka jingkitkhlieh kaba janai na ka bynta ki paidbah bad kum ki trai District ki tip kham bha ruh ïa ka jingeh ki paidbah bad ym kum kito ki kyrtong kiba wan tang ha ka por election tang namar ba ki don spah don phew” ong u samla Albert Maring.
Kum ki paidbah ka dong Ri Bhoi kampher la u dei u khynriam u pnar, u bhoi u war bad kito hi kiba la shong la sah ne la hap sohpet ha Ri Bhoi ki la long trai ha Ri Bhoi bad ki tip kham bha naduh ka riti ka dustur bad kiwei kiwei ki jingeh ba ki paidbah ki ïa kynduh ha ka District, ong u Samla Elbert Maring.
U la bynrap ruh da kaba ong, haba jied ïa ki nongmihkhmat da ki briew kiba nabar ka District kane ka pynjngai bad ka pynlong nowei ïa ki trai shnoing hapoh ka District, namar kim tip ïa ka riti ka dustur jong ki ri ki raid bad kim da don eh ka jingkitkhlieh na ka bynta ka khia ka shon ki paidbah bad ha ka ïap ka im u paidbah.
U la ong ruh ba ki nongmihkhmat kiba nabar ki long hi thik kum ki panah bad kham pher hi na ki pa trai kiba don ka jingkitkhlieh ïa la ki khun ki kti bad kane la ong ruh wat ha ka liang ki nongmihkhmat kito hi kiba la hap sohpet ha ka District ki don ka jingkitkhlieh kaba khraw ïa ki paidbah.
Shuh shuh, u la pynpaw ruh da ka ba ong ba ka Ri Bhoi ka la kiew mynta ha ka jingnang jingstad bad byllai ki riew stad bad ki riew shemphang kynthei bad shynrang hapoh ka District bad kaei kaba u la ban khia ban jied da ki trai District ka long ba ka long ka jinglehrain ïangi lada ngim ai lad ban jied noh da ki trai shnong la jong bad ban pynjob da ki briew ba nabar, namar ka thong jong ki ka long tang ban kamai spah bad ban wan khaïi pateng bad ym ban wan shakri kaba shispah ha ka shi spah na ka bynta ka jingdonkam ki paidbah ka District, u la bynrap.
