Nongstoiñ, Lber 28: Ka jingmang pisa jong ka sorkar na ka bynta ban pynbha biang ïa ka surok na Nongstoiñ sha Sohpian, kaba jngai kumba hynñiew kilomitar tam ka la pynkmen ïa ki paidbah. Hynrei haba la pyntrei pat ka la pynlyngngoh pynban, namar katkum ka jingpynbna jong ka sorkar ba ka la ka mang pisa kumba phra klur tyngka tam na ka bynta katei ka surok, hynrei ka rukom trei pat kam iahap bad ka mang tyngka.
Ki sordar jong ki hynñew tylli ki shnong ba kynthup ïa ka Pyndenglawar, Nongritong, Mawrokporsohsat, Syllei ïawkheiñ, Porsohsat, Nongsohpian bad Domkohsam, hynne ka sngi ki la hiar ban thew ïa katei ka surok bad la lap ba na ka jaka ba sdang ka jingheh ka surok ka don 1.40 mitar. Hynrei katba nang jrong ka nang rit bad doh ki jaka ba ka don tang 1.30 mitar bad don ki jaka kiba kham rit shuh shuh, ha kaba lada ïakynduh ar tylli ki kali rit ruh ym ngiam satia.
Hadien ba kitei ki sordar ki la dep thew ïa katei ka surok bad haba ïakren bad ki nongthoh khubor, ki la ong ba ïa katei ka jingmang pisa jong ka sorkar, u MLA ka Nongstoiñ Constituency dalade u la pynbna sha ki paitbah nongshong shnong ïa katei ka juh ka mang pisa, da kaba pynshai ruh ba ka jingshna ïa katei ka surok kan long da ka Intermediate Lane hynrei mynta pat ka long da khongpong.
Kitei ki rangbah shnong ki la ong ruh ba na ka liang jong ki bad ki paidbah kim hun satia ban shu sngap, kumta ki la dawa na ka sorkar bad u MLA ba ki dei ban pynshai halor katei ka surok balei ba na sdang ka heh, hynrei katba nang jngai ka nang rit pynban.
Nalor kata ki la ong ruh ba kaba kham pynlyngngoh ka long ba ka jingsiang rong ïa katei ka surok ka long thik kumba thied sopti thymmai. Ynda poi ha ïing sa phong da kaba rim hapoh bad phong da kaba thymmai ha jrong, namar ba ïa ka rong kaba la dep siang mynshuwa u kontraktor um shym la khlong satia hynrei u siang na jrong. Katei ka rukom siang jong kam long kaba pynhun ïa ki paidbah.
Khatduh eh kitei ki sordar shnong ki la ong ba ka sorkar bad u MLA ki dei ban pynshai hapoh saw sngi bad lada kim lah ban leh ïa kata kim banse ban ïaid da kawei pat ka lynti.
Halor kane, na ka liang ka WKSU pyllun ka ai jingkyrshan ha kaba ïa dei bad ki 7 shnong kiba lah mih madan ha kaba ïadei bad ka surok Nongstoiñ-Sohpian, na ka daw ka jingbym hun ha kaba iadei bad ka jinglong jingman ka surok ba la khot ban pyntrei da ka National Highway Authority of India (NHAI).
Ka seng ka la ïakynduh ruh bad kitei ki nongialam shnong ban ia mir jingmut ïa ka rukom trei ïa katei ka surok, namar ka ïa pher katkum ki tyllong khubor ba la mih ka long ban pyntrei Intermediate ba la sanction 8 klur. Hynrei kumba ka long mynta ka la pynshaiong ngaiñ ïa ki nongialam shnong ki nongñiah kali kamai bad ki paidbah.
Na ka liang ka seng ka la leit buh da ka RTI ha ka 01/03/2022 ban tip kham bniah ïa ka tynrai jong katei ka surok bad na ka liang ka seng kan ïai buddien ruh ïa ka jinglong jingman jong kane ka surok. Ka seng ka ai khublei ruh ïa ki rangbah shnong ba ki la kloi ban mih madan ïa ka jingbha ka jingmiat jong ka dong ka thaiñ jong ki 7 shnong.
