Saw snem ngi la ailad ïa ka UDP, mynta ka ladei ka por ba ka NPP kan shimti ïa ka EC: Pynïaid Syiem

Shillong, Jylliew, 19: Ka National Peoples Party (NPP) kaba ïatreilang bad ka Indian National Congress (INC) ban knieh kynthet ïa u lakam synshar na ka kti jong ka United Democratic Party (UDP) ha ka 19 tarik u Jylliew, 2023 ka la thaw thymmai da ka kynhun kaba la tip kum ka Khasi Hills Democratic Front (KDF) ka ban ïalam ïa ka Executive Committee kaba thymmai ha Khasi Hills Autononomous District Council.
U MDC jong ka NPP na Sohryngkham Constituency u Bah Pynïaid Sing Syiem ha ka jingïakren bad ki lad pathai khubor u la ong, ba ka kynhun Khasi Hills Democratic Front ka don mynta 18 ngut ki MDC ba kynthup ïa 12 ngut ki MDC na ka NPP bad 6 ngut na ka Congress.
Ïa ka Khasi Hills Democratic Front yn khlieh da u Bah Pynïaid Sing Syiem kum u Chairman, u Bah Pynshngaiñlang N. Syiem kum u Vice Chairman, u Bah Teiborlang Pathaw kum u Secretary bad u Bah Carness Sohshang kum u Ass. Secretary.
“Katkum ka AD Rules, kumba la pynbna da u Chairman (hapoh ka Iingdorbar) ba kan don ka jingthep kyrteng na ka bynta shuki Chief Executive Member ngi ladep ban thep kyrteng, kawei ka thup la tyrwa da u Bah Bajop Pyngrope bad la kyrshan da u Bah Carnes Sohshang katba kawei pat ka thup kyrteng la tyrwa ïa ka kyrteng jong nga kum u Chief Executive Member ba thymmai da u Bah Batskhem Ryntathiang bad la kyrshan da u Bah Fantin Joseph Lakadong,” la ïathuh u Bah Pynïaid.
U la ïathuh ba hadien ka jingbishar ïa ki kot ki sla ba la thep kyrteng da u Secretary ka Legislative la shem ba ki biang lut nadong shanong.
Kumba ka long mynta, la ïoh jingtip ba na ka liang jong ka UDP bad ka kynhun kim shym la thep kyrteng satia ban ïakhun ïa ka shuki CEM.
Haba kylli, u Bah Pynïaid u la ong ba ka thong kum ki MDC ka long ban kyntiew shwa nyngkong eh ïa ka District Council.
U la kam ruh ba hapoh ka NPP ym ju don mano mano ruh ba khyrwait shabi hynrei ngi la don lypa ka jingbunpaid naduh mynno ban shimti ïa ka EC kaba thymmai hapoh ka Council hynrei dei namar ka jingjynsur mynsiem jong ka NPP la ailad ïa ka UDP la saw snem kynthih bad mynta pat ka la dei ka por ïa ka NPP ban shimti noh tang shi snem ïa ka EC ba thymmai.
Haba pynksan ïa ka jingïatreilang hapdeng ka NPP bad ka Congress ha Khasi Hills Autonomouos District Council u Bah Pynïaid u la ong, “hapoh ka District Council ka long laitluid, kano kano ka kynhun kaba ïalam ïa ka Executive Committee ka lah ban ïatreilang bad kano kano ka kynhun. Ha ka Jylla ka kyndon treikam ka don la ka jong katba ha ki District Council ki don la ka jong.”