Saw ngut kiba ai jingkren na kiba kyrshan, ym don jingkren na kiba pyrshah

Khliehriat nohprah 19: Ka jingpynlong ïa ka public hearing na ka bynta ban shna ïa ka karkhana dewbilat jong ka M/s Shree Cement Ltd ha shnong Daistong East Jaiñtia Hills District mynta ka sngi ka la ïaid beit haduh kaba kut ha kaba ki la don 114 ngut kiba la poi sha katei ka public hearing bad ki la don saw ngut kiba la ai jingkren ha rynsan kiba la ai ka jingkyrshan ïa kane ka public hearing jong ka Shree Cement bad yn don jingkren na ka liang kito kiba pyrshah ïa ka public hearing.
Na ka liang u Doloi ka elaka Nongkhlieh, u Na-o Sukhlain, u la ong ba kiba bun ki khun jong ka elaka ki dei kiba duk ba duna ka jingioh bad don bun ruh ki samla pule ki kwah ban bteng ïa ki jingpule hynrei namar ba duna jingioh ki samla pule ki kynran dien noh te ki khun ka elaka ki kylla long kiba sah dien, u la ong ruh ba ha ki jingialang ba la pynlong hapoh ka elaka ki jingïalang kiba naduh ki snem ba la leit ki la iakren halor kane ka kam bad mynta la lah ban pynlong ïa kane ka hearing.
U Doloi u la ong ruh ba u khmihlynti ba da ka jingwan kane ka company kan iarap shibun ïa kiba duk ba kyrduh bad kin ioh jingmyntoi lang bad kin ioh ruh ka lad ioh kam ioh jam ban kyrshan ïa ki longïing longsem jong ki.
U Dkhot Executive Elaka Nongkhlieh, u bah Willingson Sukhlain, u la ong ba ha ka dorbar ki la dep rai ban wanrah ïa kano kano ka karkhana dewbilat lane ka karkhana coke hapoh elaka, hynrei hadien ka jingwan ki karkhana coke ki lap ba ka ktah ïa ka mariang khamtam ïa ka lyer katba na ka bynta kane ka Shree Cement pat la ïa mynjur lang da kaba la ïa rah kti lang ha ka dorbar kumta ha ka jingiaid lynti ki nongialam ka elaka la lah ban pynurlong ïa kane ka public hearing mynta ka sngi
“Ngi khmihlynti ba kane ka kam kan iaid shakhmat ba kan long ka jingkyrkhu ïa ki paidbah jong ka elaka Nonglhlieh, ngi khmihlynti ruh ba ka company kan shim ïa ki lad ban iada ïa ka mariang ban lait na ka jingsniew ka mariang” ong u bah Willingson Sukhlaiñ. .
Kiwei pat kiba la ai jingkren ki kynthup u Secretary elaka Nongkhlieh, u bah Fenching Bareh bad u Waheh Shnong ka Lumshyrngan, u bah Remi Shadap bad kine baroh ki dei kiba ai ka jingkyrshan pura ïa ka Shree Cement Ltd.
Ïa katei ka public hearing la pynïaid da u Environmental Engineer ka tnat Meghalaya State pollution Control Board, u bah Y.F.Laloo, la ïa don ryngkat lang u Deputy Commissioner ka East Jaiñtia Hills District,u Shivansh Awasthi, IAS, u Superintendent of Police East Jaiñtia Hills District, u Vikash Kumar, IPS, ka ADC, ka kong J.U.Kharpuri, u SDO Sadar, Manish Kumar, IAS bad kiwei kiwei ki riew rangbah.