Satang ki jingïakhih imat ban treikam noh kane ka Shlem pule, ong ka WKSU

Nongstoiñ, Nohprah 23 : Ka seng West Khasi Students Union, ka la dawa na ka sorkar jylla ban pynurlong noh kloi lan ïa ka Industrial Training Institute ha Sohpian West Khasi Hills, kaba la shu sahkut mynta la 12 snem mynta naduh ba ka la dawa bad iakren bad ka Directorate of Employment and Craftsmen Training Shillong.
Katkum ka jingïathuh da u President Bah D.Sun, la ong ba na ka liang ka tnad Directorate of Employment and Craftsmen Training Shillong, hadien bun bun snem ba ka la wad jaka ban tei ïa katei ka jaka pule, ka la ïakynduh bad ki nongïalam jong ka seng ha snem 2013. Ha utei u snem ki bor ba dei peit jong katei ka tnad, ki la phah ïit jaka khnang ban tei ïoh tei noh la ka jong ka building ba pura.
Halor kane ka mat, ki nongïalam jong ka seng khlem da pynslem ki la ïakynduh mar mar ïa u sordar jong ka shnong Sohpian bad ïa u trai jaka ban ïa kren pynbeit ïa ka jaka kaba don mar syndah ka Fourth Battalion Nongstoiñ Sohpian, kaba long markhap ruh bad ka surok bah NH-44 E. Na ka liang u trai jaka ruh bad u sordar ruh, khlem artatien u la mynjur ban die noh ïa ka jaka sha ka tnad ba dei peit na ka bynta ban tei ïa ka I.T.I.
Haduh mynta ka jingïaid jong ka I.T.I ha Sohpian, ka long ba ïa katei ka jaka la dep pynbiang nadong shadong da katei ka tnad ba dei peit ha kaba ïa dei bad ka jingsiew ïa ki trai jaka bad ha kine ki snem la dep pynieng ruh ïa ka building.
Kumta na ka liang ka seng ka pynpaw ba ka la dei ka por ba ka sorkar ka dei ban pynkynriah noh mardor na ka building ba shu shong wai ha sor Nongstoiñ sha Sohpian, khnang ba ka sorkar kan pyni kam kumba ka ju kop da kaba rah noh na ka ïing kaba rim sha kaba thymmai, na ka bynta ka jingmyntoi ki khun samla jong ka District.
Kumban shu pynkynmaw ba na ka liang ka sorkar barim hapoh ka jingïalam jong u Dr. Mukul Sangma kum u Myntri rangbah ka jylla bad myntri ka tnad pule Kong Ampareen Lyngdoh, ki sdang ban shimkhia bad ai ka jingmynjur ban don noh la ka jong ka I.T.I ba pura ha Sohpian. Hynrei kim shim ïoh lad ban pynurlong ban wan plie ban tei ïa katei ka jaka ai jinghikai, namar ka jingkylla jong ka por.
Ka seng ka don ka jingkyrmen skhem ba kane ka sorkar ba mynta hapoh ka jingïalam jong u Conrad Sangma, ban shimkhia noh ïa katei ka ïing kum ka shlem ai jinghikai pyntbit ïa ki samla pule jong ka thaiñ sepngi baroh kawei, ha ki laiñ pule bapher bapher.